Sekcija hudźba

předsyda
Měrko Šołta

 

Hižo ze spočatkom załoženja Maćicy Serbskeje, mjenujcy z dnja sławneje zhromadźizny 18.4.1845 na Winicy w Sprjewinym dole pod Budyšinom, sta so z jednym z jeje najwažnišich nadawkow organizować spěwanske koncerty jako narodny swjedźeń a to wosebje po jara wuspěšnym 1. serbskim spěwanskim swjedźenju na Budyskej třělerni dnja 17. oktobra 1845.
Najebać stajnje znowa přez maćicarjow přihotowanych wulkich spěwanskich swjedźenjow dóńdźe poměrnje pozdźe k załoženju wosebiteho hudźbneho wotrjada.
Hakle 1895 namjetowaše na hłownej zhromadźinje Maćicy Serbskeje Arnošt Muka załoženje tajkeho, kotrehož nachwilny nawod a natwar přiwza K.A. Kocor. Dalši  nadawk měješe być wudaće notow Kocorowych měšanych chórow. Njezrealizowaštej pak so tutej wotpohladaj. Hakle lěće pozdźišo dóńdźe k woprawdźitemu załoženju hudźbneho wotrjada. Předsyda bu Jurij Pilk, městopředsyda kantor Pětr Hila, dalši čłonojo předsydstwa běchu kantor Smoła, wučer Słodeńk a wučer Pjech. Předsydźa buchu pozdźišo Jan Rječka, Jurij Słodeńk a Bjarnat Krawc. Hudźbny wotrjad přihotowaše serbske spěwanske a hudźbne swjedźenje kaž tež hudźbne materialije.
Maćica Serbska wudawaše direktnje a indirektnje wot wšeho spočatka hač po 1. swětowej wójny skoro cyły serbski notowy material, pak ćišćany, pak hektografowany, a zastara z tym wosebje potrjebu serbskich chórow.
Wšě serbske spěwanske swjedźenje hač do 1. swětoweje wójny běchu poprawom Maćične koncerty: namjety a žadanja wuńdźechu z rjadow Maćicarjow na hłownych zhromadźiznach a z jich Wšě serbske spěwanske swjedźenje hač do 1. swětoweje wójny běchu poprawom Maćične koncerty: namjety a žadanja wuńdźechu z rjadow Maćicarjow na hłownych zhromadźiznach a z jich rjadow wuzwoli so trěbny swjedźenski komitej. Tutón organizowaše organizatoriski wotběh koncerta kaž tež na to slědowaceje swjedźenskeje hosćiny a bala. Dnja 2. junija 1923 załoži so Zwjazk serbskich spěwarskich towarstwow. Wulki serbski koncert 3. oktobra 1923 bě posledni, kotryž wuhotowaše hromadźe z nim Maćica Serbska. Jenož Delnjoserbska Maśica organizowaše hišće někotre lěta dlěje centralne serbske swjedźenje, kaž na př. Wětošowske serbske swjedźenje 1929–1931.

Nětčiša sekcija hudźba Maćicy Serbskeje załoži so w lěće 2000. Zaměr sekcije je, so rozestajeć ze serbskej hudźbu, wosebje z jeje herbstwom a kritiski přewod z jeje wobchadom; slědźić na polu serbskich hudźbnych stawiznow runje tak kaž na polu tradicionalneje serbskeje ludohudźbneje kultury; rozestajenje wo pućach a přichod serbskeje hudźbneje kultury.

Dlěši čas je nětko hižo hudźbna sekcija Maćicy Serbskeje jeničke serbske zjednoćenstwo, kotrež so zaběra wědomostnje a popularnowědomostnje ze serbskej hudźbu, kaž tež docyła z hudźbnej kulturu we wšej jeje šěrokosći, wobmjezujo pak so hłownje na herbstwo a tradicionalnu serbsku ludowu hudźbu.