Wot 15.-17.09. zetkachu so zastupjerjo čłonskich towarstwow němskeje wotnožki CIOFF w Scheeßelu/Nižosakska.

Na hłownej zhromadźiznje rozprawješe předsyda Norbert Müller wo podawkach zašłeho lěta a poda informacije swětoweje organizacije. Zhromadnje spominachu tež na njedawno zemrěteho čestneho předsydu Bernda Schäfer, kotryž organizowaše zhromadnje ze serbskimi čłonskimi towarstwami 2014 swětowy kongres CIOFF w Budyšinje sobu.

We wólbach wuzwolichu so Klaus Hohmeier jako městopředsyda (hižo dotalny městopředsyda), Silvia Jäger jako jednaćelka a Sabine Schmett jako zamołwita za naležnosće GEMA (a jako přisydnica w předsydstwje).

SRSS njemóžeše so 2020 jako zastupjerka sekcije Němskeje na CIOFF-Folkloriadźe w Ruskej pandemije dla wobdźělić. Hłowna zhromadźizna dorozumi so na to, zo delegowanje SRSS na přichodnu Folkloriadu dale wobsteji (hišće je njejasne, hdźe tuta budźe). 

Kulturny a ramikowy program wuhotowaše domjaca skupina Beekscheepers. Přichodna hłowna zhromadźizna planuje so za lěto we Łužicy pola Serbow.

Na zetkanju běchu tež serbske čłonske organizacije běchu zastupjeni:

Stephanie Bierholdtec a Marija Knaackowa – Serbski folklorny ansambl Wudwor,

Tobias Rucha – Serbski ludowy ansambl,

Gabriel Krawc – Serbska rejowanska skupina Smjerdźaca (SRSS);  

a za Folklorny festiwal Łužica, Domowinu a župu Delnja Łužica Marko Kowar, Clemens Škoda, Pětr Brězan.

CIOFF je swětowa organizacija za organizowanje folklornych festiwalow a folklornych skupinow. Mjezynarodny folklorny festiwal Łužica je do syće CIOFF zawjazany a tuta słuži wosebje jako platforma kontaktow na mjezynarodnej runinje ( www.CIOFF.org ).