Sobuskutkowaca projekta ZARI – syće za serbsku rěč a regionalnu identitu prof. dr. Nicole Dołowy-Rybińska skutkuje tónle tydźeń jako “profesorka na wopyće” (“Visiting Professor”) na fakulće za wjacerěčnosć uniwersity Groningen w Nižozemskej. Jutře, wutoru 21.10., předstaji wona projekt ZARI w Europskim slědźerskim centrje za wjacerěčnosć a wuknjenje rěče Mercator w Leeuwardenje. W dalšimaj přednoškomaj rozswětli Nicole Dołowy-Rybińska spomóžnu rólu na praksu wusměrjeneho slědźenja – tak mjenowany “Action research” – za planowanje rěčneje rewitalizacije hornjoserbšćiny. Tutej so wotmějetej w seminarje Instituta za slawistiku Pólskeje akademije wědomosćow we Waršawje (29.10.) a digitalnje w seminarje Sociolinguistiskeje slědźerskeje skupiny Balearskich kupow w Palmje (31.10.).