Přihoty Hłowneje zhromadźizny Domowiny stejachu w srjedźišću posedźenja Zwjazkoweho předsydstwa Domowiny, dnja 15. februara 2019, kotrež wotmě so na žurli Serbskeho domu w Budyšinje. Tak wobzamkny so naćisk dźěłowych směrnicow Domowiny za dobu 2019 – 2021, kotryž ma so na Hłownej zhromadźiznje Domowiny dnja 30. měrca w Chrósćicach wobjednawać. Nimo rozprawy Zwjazkoweho předsydstwa diskutowachu přitomni tež namjet župy Jan Arnošt Smoler. W tutym žada sebi župa, zo ma so w Sakskej ewaluować wučba serbšćiny. Cil ma być, zo je nawuknjenje serbšćiny za kóžde dźěćo na wysokim niwowje zaručene. Wo namjeće rozsudźić ma hłowna zhromadźizna. W dalšim dnjowym dypku zaběrachu so z próstwu župy Delnja Łužica, přewjesć w bliskim času klawsuru nastupajo Witaj-ewaluacije wučby serbšćiny w Delnjej Łužicy. Zwjazkowe předsydstwo da Rěčnemu centrumej WITAJ nadawk, přihotować a přewjesć klawsuru, kotraž ma so w aprylu tutoho lěta přewjesć. Zaběrał je so gremij zdobom z kritiku župy Jan Arnošt Smoler nastupajo wužiwanja Serbskeho domu. W zwisku z planowanym wutwarom areala na Lawskich hrjebjach w Budyšinje jewješe so ideja, přeměstnić Serbsku kulturnu informaciju (dale SKI), kotraž je tučasnje w Serbskim domje zaměstnjena. Při tym kritizuje župa, zo wućah SKI narok zjawneho domu zanjecha. Jan Budar, direktor Załožby za serbski lud, informowaše přitomnych wo zetkanju ze župnym předsydstwom a docpětej přezjednosći nastupajo dalšeho trěbneho postupowanja. Tak je Budar mjez druhim přilubił, zo chce w předpolu dalšich rozsudow z potrjechenymi cyłkami rěčeć a móžny koncept ze župu a Zwjazkowym předsydstwom Domowiny wothłosować. Čłonojo Zwjazkoweho předsydstwa Domowiny zaběrachu so tež z njedawnym medijowym wozjewjenjom “Serbskeho sejma”. Domowina je po swojich wustawkach a płaćiwych zakonjach Sakskeje a Braniborskeje zastupjerka zajimow serbskeho ludu. Wona njese z tym zamołwitosć, naležnosće serbskeho ludu zastupować. Zwjazkowe předsydstwo je sebi přezjedne: Dołhož Serbski sejm Domowinu jako politisce připóznatu rěčnicu zajimow Serbow wotpokazuje, njeje zakład za zhromadne dźěło date. Wo rozsudźe informowaše předsyda Domowiny přitomnych hosći “Serbskeho sejma” po posedźenju.