"To je naša najwažniša tema”, županka wuzběhny. “Wšo druhe dyrbi so podrjadować”, praji županka nastupajo aktualneje situacije na zakładnej šuli w Radworju. Čłonojo župneho předsydstwa “Jan Arnošt Smoler” Budyšin so jeje słowam na swojim měsačnym wuradźowachu přizamknychu. Su zludani wo tym, što so ze staršimi w Radworju stawa, hdyž LaSuB jim radźi, swoje dźěći do druhich šulow słać, chcedźa-li serbsku wučbu we wjac hač jenož předmjeće serbšćina. To njemóže być w zmysle Domowiny. Wona měła staršich a dźěći cyłkownje hišće wuraznišo podpěrać.

Poskitk serbskeje wučby na dalšej šuli w Budyšinje tohorunja župnemu předsystwje na wutrobje leži. Rozjimachu móžne puće, z kotrymi dalšemi šulemi měli so do rozmołwow dać.

Čłon wuběrka doma Měrćina Nowaka-Njechorńskeho Zwjazkoweho předsydstwa Domowiny, Kito Hendrich, čłonow wo aktualnym stawje informowaše. Dom ma so jako muzej zdźeržeć a dotalna wustajeńca na interaktiwnu wustajeńcu koncipować.

Dale dorozumichu so čłonojo wo klětušich projektach. Składnostnje 130. posmjertnin Marje Grólmusec budźe so 25.4.2026 literarno-muzikaliske popołdnjo w Serbskim domje wotměć. Jazzowe trio “Sotry wjesela” budźe čitanje wo Grólmusec w serbskej a němskej rěči wobrubić.

Klětu w lěće ma być prózdninski camp za serbske dźěći w Połpicy w tamnišim lěsnym kubłanskim domje. Župa program sobu wuhotuje.

Přichodny wjeršk pak budźe koncert chóra Meja a to 8. nowembra na žurli Serbskeho domu. Spěwarjo chóra přijědu z cyle wosebitym programom Jurja Winarja do Budyšina.