Třiceći zastupjerjow Domowiny a serbskich institucijow je so pjatk (18.3.) popołdnju na žurli Serbskeho domu a digitalnje wo postupowanju z próstwami za serbske wulkoprojekty w ramiku změny strukturow w Sakskej dorozumiło. Zajimcy móžachu połdra hodźiny livestream wuměny informacijow wo spěchowanskich směrnicach w Sakskej a dźěławosći serbskich akterow w Braniborskej sćěhować. Po tym su w druhim dźěle diskusije, kotruž je předsyda wuběrka Domowiny za naležnosće změny strukturow, hospodarstwo a infrastrukturu, dr. Hartmut Leipner, moderował, praktiske aspekty a prašenja kooperacije rozjimali.