Stejišćo nastupajo cyłolětneho wupójsnjenja němskeje chorhoje (namjet frakcije AfD)

Próstwu raznje wotpokazamy. Trajne wupójsnjenje jenož němskeje chorhoje sugeruje jednotu, hdźež je poprawom mnohotnosć žiwa.

Wokrjes Budyšin je dźěl serbskeho sydlenskeho ruma. Štóž chce woprawdźitu towaršnostnu zwjazanosć, dyrbi tež serbsku rěč w zjawnym rumje skrućić – w šulach, na nadróžnych taflach, w zarjadnistwach. Nic z němskej chorhoju, ale z woprawdźitym a widźomnym připóznaćom kulturneje wšelakorosće.

Stejišćo nastupajo cyłolětneho wupójsnjenja třoch chorhojow na šulach a zarjadniskich twarjenjach (wokrjes Budyšin)

Je derje, zo so serbska chorhoj we wobzamknjenju wobkedźbuje. Wažnišo pak je, zo so serbski lud jenož symbolisce njepodpěra, ale tež z konkretnymi naprawami.

Njech je wokrjes Budyšin z přikładom, hdyž serbsku rěč spěchuje a to widźomnje – w šulach, wšědny dźeń a w zarjadach.

Přewšo dwělomne je w aktualnej financnej situaciji za natwar chorhojowych sćežorow nimale 80.000 eurow inwestować. Njedawno bu projekt partnerstwa za demokratiju hladajo na falowace srědki zakónčeny. Program, kotryž je tež zesylnjenju serbskeje rěče, kultury a młodźinskeho angažementa přinošował.

Zjimajo: Hdyž chcemy mnohotnosć, je wjace trjeba, hač serbsku chorhoj wupowěsnyć. Trjeba je runoprawosć – w rěči a widźomnosći.