Dr. Jörg Heidig (Prozesspsychologen) je dźensa w Budyskim Serbskim domje aktualne wuslědki Łužiskeho Monitora z wosebitym fokusom na Serbow předstajił. Něhdźe 50 zajimcow, na městnje a online, sćěhowaše jeho wuwjedźenjam.

Na iniciatiwu Domowiny běchu Serbja lětsa jedne tematiske ćežišćo naprašowanja. Tak je lětuši Łužiski Monitor prašenja k wjacerěčnosći, kulturnej identiće a róle Serbow w změnje regiona wopřijał. Wuslědki pokazuja jasne rozdźěle: Serbska kultura so zasadnje we Łužicy wot ludnosće šěroko připóznawa a jako wažny dźěl regionalneje identity wobhladuje. 83 procentow naprašowanych ze serbskim pochadom so wuznawa, zo jim Łužica jara na wutrobje leži. Mjez naprašowanymi bjez serbskeho pozadka běchu to 62 procentow. „Předleži-li bliskosć k serbskemu, pokaza so pozitiwne wuwiće. Ale tež 62 procentow je wysoka ličba, kotruž njeměli podhódnoćić“, dr. Heidig wuzběhny. Cyłkownje wuznaja so po naprašowanju něhdźe 140.000 Łužičanow we wěstej měrje serbstwu.

Wosebje zajimawy je wid na rěč: Za 72 procentow naprašowanych słuša serbšćina bytostnje k identiće Łužicy. Nimale połojca začuwa serbski postrow „witaj“ samo jako regionalnje typiski postrow – přirunajomnje z „moin“ na sewjeru abo „servus“ w Alpach. K tomu rozłoži předsyda Domowiny Dawid Statnik: „Serbskosć njeje jenož prašenje za nas samych, ale integralny wobstatk cyłeje Łužicy. Naš zaměr je, hač do 2100 něhdźe 100.000 serbsce rěčacych docpěć. Wobhladuješ-li sej aktualne wuslědki Łužiskeho Monitora, zda so tutón zaměr realistiski.“

Łužiski Monitor 2025 zwobraznja tuž wosebite impulsy serbskeje zhromadnosće. Jasne snadź je: přichod Łužicy njebudźe so bjez Serbow móc wuhotować.

Pozadk:

Wot 2020 přewjeduje towaršnosć MAS reprezentatiwne studije k strukturnej změnje we Łužicy. 2025 wotmě so šeste naprašowanje. Łužiski Monitor naprašuje so lětnje wjace hač 1.000 ludźi ze sakskeje a braniborskeje Łužicy. W srjedźišću steji jich wid na problemy, šansy a strategije přichoda po zakónčenju wudobywanja wuhla. Zamołwitaj staj Stefan Bischoff (MAS) a dr. Jörg Heidig (Prozesspsychologen). Dalše informacije na: https://lausitz-monitor.de/

Zdźělenka medijam, Budyšin/25.08.2025