Dźensa wuradźowaše prezidij w Budyšinje. Na dźěłowym planje stejachu mjez druhim aktualne temy:

Z wida Domowiny je dawno na času, štyri awtochtone narodne mjeńšiny Němskeje do Zakładneho zakonja zapřijeć. Prezidij je tuž zludany nastupajo aktualne wuprajenja Zwjazkoweho ministerstwa nutřkowneho (BMI), kotrež tute žadanje njepodpěra.

„Smy zludani, zo je so ministerstwo hižo nětko přećiwo tomu wuprajiło, narodne mjeńšiny do Zakładneho zakonja zapisać. Tajki rozsud njemóže a njesmě so na runinje ministerstwow tworić. Wo tym dyrbi Zwjazkowy sejm Němskeje rozsudźić. Smy wjacore pozitiwne signale ze stron zapósłančow a zapósłancow dóstali a so dale za to zasadźujemy. Wočakujemy wot społnomócnjeneho za narodne mjeńšiny knjeza Fabritiusa, zo nas w tutym nastupanju podpěruje.”, tak prezidij Domowiny.

Delegowanja a kulturna wuměna

Prezidij je we wokolnym wothłosowanju wo tym rozsudźił, kulturnu wuměnu mjez drastowej a rejowanskej skupinu Barbuk a ameriskej skupinu, kotraž je so w Delnjej Łužicy wotměła, podźělnje spěchować. Dale pojědźe Serbski folklorny ansambl Wudwor na měšćanski swjedźeń do Cristuru Secuiesca w Rumunskej, a to wot 30.07. do 02.08.2026.

W meji poda so předsyda Domowiny Dawid Statnik jako jenički serbski zastupjer na zhromadnu jězbu katolskeje a ewangelskeje cyrkwje do Brüssela (05.-08.05.2026). Nadawk předsydy budźe, wosebje serbske ćežišća z hłownymi zastupjerjemi ewangelskeje kaž tež katolskeje cyrkwje zastupować.  

Nimo toho přihotowachu čłonojo prezidija přichodne posedźenje zwjazkoweho předsydstwa, na kotrymž maja so do znajmjeńša štyrjoch gremijow wosoby powołać. 

Posedźenje budźe 27. měrca w Starej šuli w Židźinom.