Dźensa wuradźowaše prezidij na swojim 8. posedźenju w Serbskim domje w Budyšinje. Wo sćěhowacych temach mjez druhim wuradźowachu.

Myto za hospodarstwo - pytanje kandidatow za wuběrk  

Jeli maće zajim na regionalnym wuwiću a dwurěčnosći we Łužicy a chceće w mytowanskim wuběrku sobu skutkować, so pola nas přizjewće. Pytamy angažowane wosoby z hospodarstwa, wědomosće abo ciwilneje towaršnosće. Čłonstwo w Domowinje njeje za to winowatosć. Mytowanski wuběrk zetka so jónu do dwójce na lěto a rozsudźi komu Domowina “Myto za hospodarstwo” spožči. 

Hdyž sće zajimowani, sćelće nam hač do 06.03.2026 mejlku na petr.brezan@domowina.de abo list na Domowina – Zwjazk Łužiskich Serbow, Póstowe naměsto 2, 02625 Budyšin a podaće (před)mjeno, adresu, mejlowu adresu a telefonowe čisło. 

Na swojim přichodnym posedźenju budźe Zwjazkowe předsydstwo Domowiny potom čłonow za dobu 2026-2029 powołać. 

Politiska situacija w Braniborskej

Aktualnych wuwićow koalicije w Braniborskej dla, wuměni so prezidij dźensa tež wo doporučenjach za koaliciske jednanja. Temy su dale polěpšenje kubłanskeje infrastruktury, dołhodobne skrućenje finančnych srědkow Załožby za serbski lud, garantowane financowanje zjawnoprawniskich medijow kaž tež mjeńšinowa politika na zwjazkowej runinje.

Delegowanja

Serbska rejowanska skupina Smjerdźaca z. t. poda so na mjezynarodny dudakowy folklorny festiwal do Strakonice, kotryž budźe wot 20.– 23.08.2026. Tam budu Smjerdźečenjo serbsku ludowu kulturu na polu reje, hudźby a spěwa reprezentować. Domowina spěchuje wudawki za transport z busom.

Prezidij je schwalił, zo budźe so Domowina ze załoženskim čłonom noweho turistiskeho zwjazka Hornja Łužica stać. Zapisane towarstwo ma nowu třěšnu strukturu tworić, dokelž dotalna forma Marketingoweje towaršnosće Hornja Łužica (MGO) po cofnjenju třoch wuchodo-sakskich lutowarnjow hižo nošna njebě. Nimo Budyskeho a Zhorjelskeho wokrjesa budu tež turistiske teritorialne zhromadźenstwa městow a gmejnow z čłonom. Nowa struktura zwjazka ma nimo toho zmóžnić, zo móža dalše zwjazki jako čłon přistupić.