Wčera bě prezidentka krajneho sejma Kristina Herbst (Schleswigsko-Holsteinska) z hosćom pola Domowiny w Budyšinje. Zhromadnje z předsydu Dawidom Statnikom, městopředsydku Marlis Młynkowej a hłownej jednaćelku Judit Šołćinej rozmołwješe so Herbst wo aktualnym połoženju serbskeho ludu. Přewodźał je ju předsyda frakcije CDU w Schleswigsko-Holsteinskim krajnym sejmje, Tobias Koch. Dale přizamkny so tež zapósłanc Sakskeho krajneho sejma Marko Šiman.

Tak wopyta Herbst regionalne studijo MDR. Nawodnica studija Bogna Korjeńkowa rozłožowaše dźěławosć a wjedźeše přez studijo. Po tym zetka so prezidentka Schleswigsko-Holsteinskeho krajneho sejma z Elenu Wawrikec, Filipom Budarjom a Jakubom Wowčerjom – zastupjerjemi Serbskeho młodźinskeho towarstwa Pawk – kotřiž rozprawjachu mj. dr. wo aktiwitach serbskich młodostnych a studentow, ale tež wo tuchwilnym přiběracym rasizmje, strukturelnym wumjezowanju a zhubjenju swojeje maćeršćiny.

„Serbja su ze swojej rěču, swojimi mnohimi tradicijemi a kulturnymi hódnotami drohotna a wobohaćaca mjeńšina. Wostrózbjace je, zo je wosebje serbska młodźina dźeń a bóle prawicarskim šćuwańcam a njepřećelskosćam wustajena“, praji Kristina Herbst. „Naša towaršnosć dyrbi skónčnje zaso zapřimnyć, zo mamy kulturnu mnohotnosć a ju tež trjebamy. Runje naše awtochtone mjeńšiny słušeja k nam“, tak prezidentka krajneho sejma.

„Wopyt prezidentki krajneho sejma Kristiny Herbst je wažne znamjo připóznaća za naše dźěło a naše naležnosće. Pokazuje, zo dialog mjez mjeńšinami w Němskej rosće. Wosebje mje wjeseli, zo su młodostni tež w dialogu byli – jich angažement je naš přichod, jich starosće bjerjemy chutnje.“ rjekny předsyda Domowiny Dawid Statnik.

Pozadk:

Na mjezynarodnym kongresu FUEN w septembru 2024 w Husumje bě so Kristina Herbst – bjezposrědnje po wólbach krajneho sejma w Sakskej – w swojej narěči wuraznje ze Serbami solidarizowała a jasnje přećiwo prawicarskemu ekstremizmej stejišćo zabrała. Jeje stejišćo dósta po cyłej Europje wot mjeńšinowych organizacijow připóznaće a bě wuchadźišćo wčerawšeho přeprošenja do Budyšina.

Fota: Domowina/Božena Šimanec