Wutrobnje přeprošujemy na 3. posedźenje Zwjazkoweho předsydstwa Domowiny pjatk, 5. decembra 2025, w 17:30 hodź. we wuměłstwowej hali Łužica w Choćebuzu

Što budu mj. dr. temy?

- spožčenje připóznaća młodeje ekscelency w delnjoserbšćinje (Rěčny centrum WITAJ)

- předstajenje widejoweho projekta za mnohotnosć w Delnjej Łužicy a aktualnosće z 3. kursa Zorja (Franciska Albertowa)

- serbske rěčne kubłanje na šulach Sakskeje (dr. Jana Šołćina, Katrin Suchec-Dźisławkowa)

- nowosće wokoło doma Měrćina Nowaka-Njechorńskeho (Marko Dźisławk)

Posedźenja su zjawne. Sće wutrobnje přeprošeni so wobdźělić, abo sćěhujće naše wusyłanje tež na našim youtube-kanalu @DomowinaBudysin. Wotpowědne podłožki namakaće na našej webstronje.

+++

Swójbna schadźowanka 2026 / 25-lětny jubilej Rěčneho centruma Witaj: markěrujće sej hižo raz 1. měrc 2026 15.00 – 17.30 hodź. Klětu budźe swójbna schadźowanka w Serbskim ludowym ansamblu w Budyšinje.

Dalše nowostki z Rěčneho centruma Witaj

Dźěłowe łopjena ke knize “Mała wjera” |  dalekubłanje wo mimice a gestice | 4. wudaće Serbskeje šule 2025 wušło | Płomjo 11-2025 wušło | dalši zešiwk čitanskeje křinje za zakładnu šulu | dźěłowy zešiwk „Zwučujemy a pisamy 3“

+++

Terminy (wuběr) z protyčki 01.12. do 7.12.2025 

srjodu, 03.12.2025 

• 15.30 hodź RĚČna hodźina za dorosćenych, městnosć: Nawjes 26 w Radworju, informacije poda na naprašowanje rěčna motiwatorka Raphaela Wićazowa 

• 16.00 hodź. župne předsydstwo “Jan Arnošt Smoler” Budyšin wuradźuje w Serbskim domje w Budyšinje, předsyda Dawid Statnik so wobdźěli 

štwórtk, 04.12.2025   

• 16.00 hodź. kurs tykanja paćerjow za družku Wojerowskeje drasty, w bróžni we Wojerecach, informacije poda na naprašowanje Sonja Hrjehorjowa (dalši termin budźe 11.12.) 

• 16.00 hodź. dźěłarnička serbska kuchnja za swójby pod hesłom "zymske recepty z jabłukom", městnosć: dwórnišćo 2 w Radworju, informacije poda na naprašowanje rěčna motiwatorka Raphaela Wićzowa 

• 15.30 hodź. rozmołwne koło na štwórtej Berlin-Taiwan-konferency wo temje “Narodne mjeńšiny w Taiwanje a Němskej” rozmołwjataj so prof. Da-Wei Kuan (profesor za fachowy wobłuk etnologije Narodneje Chengchi-uniwersity w Taipeh) a předsyda Dawid Statnik, wotkaz na program 

pětk, 05.12.2025  

• zeger 17:30 3. (pórědne) pósejźenje Zwězkowego pśedsedaŕstwa Domowiny, wuměłstwowa hala Łužyca (Pśiwózna droga 7, 03046 Chóśebuz), informacije poda Božena Šimanec