Dźensa zetka so prezidij na swoje 5. rjadne posedźenje w Budyšinje. Mjez druhim zaběraše so ze sćěhowacymi temami:

Přihot 2. posedźenja Zwjazkoweho předsydstwa Domowiny

Přichodne posedźenje zwjazkoweho předsydstwa budźe 26.09.2025 w 18:30 hodź. w Nowym Miłorazu. W aktualnym programje Domowiny je sej hłowna zhromadźizna wospjet nadawk stajiła, w zmysle zwjazanosće wšitke regiony Łužicy zapřijeć. Posedźenja zwjazkoweho předsydstwa tuž prawidłownje pućuja. Na spočatku posedźenja budźe županka Diana Maticowa wo aktualnosćach ze župy Jakub Lorenc-Zalěski rozprawjeć.

Dalše temy budu wotličenje hospodarskeho plana 2024 kaž tež plan za lěto 2026. Nimo toho změje zwjazkowe předsydstwo nadawk, dalšich čłonkow a čłonow do swojich wuběrkow pomjenować. Nimo toho budu dalšeju čłonow do prezidija powołać. Po wustawkach Domowiny staj dwaj dalšej čłonaj w prezidiju, kotrejuž na namjet předsydy zwjazkowe předsydstwo powoła, móžnaj. W prěnim dźělu změja čłonki a čłonojo Domowiny a hosćo zaso móžnosć, gremijej prašenja k serbskim naležnosćam stajeć.

Přihot FUEN kongresa (23. do 26.10.2025 w Bozenje)

Dale zaběraše so prezidij z přihotom FUEN kongresa, mjez druhim z naćiskom mjeńšinoweho manifesta a kwalifikowanjom zapodatych rezolucijow, kotrež budu wobstatk hłowneje zhromadźizny FUEN.

Delegowanja

Prezidij je Kuna Bruninga jako zastupjerja Serbskeho młodźinskeho towarstwa Pawk na nazymski seminar MENS delegował. Tutón budźe wot 29.09. do 05.10.2025 w Daruvaru (Chorwatska) pod hesłom “Widźomnosć přez kreatiwitu”. Seminar organizuje młodźinski klub čěskeje mjeńšiny w Chorwatskej zhromadnje z MENS. Nimo toho pojědu zastupjerjo Pawka na wuměnu z MENS do Berlina, kotraž budźe 11.10.2025. Za woboje spěchuje Domowina wobdźělenski přinošk kaž tež wudawki za transport.

Zwjazkowa politika

Poradźowacy wuběrk za prašenja serbskeho ludu poboku Zwjazkoweho ministerstwa za nutřkowne schadźuje so lětsa w nowembrje w Berlinje. Prezidij je so na móžne temy dojednał, kaž na přikład 5. finančne zrěčenje Załožby za serbski lud abo lońši rozsud konferency kultusowych ministerkow a ministrow nastupajo widźomnosć mjeńšinowych rěčow.

Poradźowacy wuběrk zaběra so z prašenjemi zwjazkoweje nutřkowneje politiki, kotrež serbski lud nastupaja. Čłonojo su zastupjerjo Zwjazkoweho ministerstwa za nutřkowne, krajneju knježerstwow Braniborskeje a Sakskeje, kaž tež serbscy zastupjerjo. Nimo toho móža so zapósłanče a zapósłancy Zwjazkoweho sejma a zastupjerjo dalšich zwjazkowych ministerstwow na posedźenja přeprosyć. Wuběrk schadźuje so lětnje.