Swjedźeń serbskeje rěče

15. raz přeprosy Rěčny centrum WITAJ štwórtk, dnja 22.05.2025, šulerjow 3. a 4. lětnika, kotřiž wobdźěla so na předmjeće serbšćina – cuza rěč, na swjedźeń serbskeje rěče do Stróže.

Dohromady wobdźěla so 157 dźěći zakładnych šulow Slepo, Kulow, Wojerecy, Wulka Dubrawa, Bošecy, Hućina, Wulke Zdźary a Nowa Wjes na zarjadowanju w Domje tysac hatow.

Na šulerjow čakaja wšelake stacije kołowokoło serbskeje rěče a kultury. Hač serbska reja, spěw, bajka abo serbski kwis – wšudźe móža so dźěći do serbskeje rěče zanurić. Nimo toho přewjedźe so rallye přez wustajeńcu, zeznaja blisku přirodu, serbski šulski muzej a redaktor Płomjenja pokaza, kak časopis nastanje. Wučerkam poskići so za čas dźěłarničkow dalekubłanje ze zabawjacymi metodami za wuknjenje druheje rěče. Swjedźeń zahaji so w 9 hodź. we wowčerni.

Zamołwita za swjedźeń serbskeje rěče:

Weronika Butendeichowa

tel: 03591 550 418 | e-mejlka: weronika.butendeichowa@witaj.domowina.de

+++

22. Filmowy festiwal NYSA

22. Filmowy festiwal NYSA prezentuje lětsa znowa wosebity rjad filmow „Regionalia”, w kotrymž pokazaja tež na serbske tematiki. Pjatk, dnja 23.05.2025 w 20.00 hodź. budźe w Kamjentnym domje w Budyšinje filmowy wječor pod titulom "SERBSKE WOBRAZY”. Nimo filma z archiwowymi wobrazami ze Zjězda Serbow 1956, w kotrymž su so wobrazy dźakowano specjelneho programa digitalizowali a so w nowym płašće ze zwukom předstaja, dožiwja přihladowarjo dalše krótkofilmy. „Krabat 3000“, „Beyond a Current State“ a „Es wäre ein anderes Meer” su krótkofilmy, kotrež su wšitke loni 2024 nastali.

Dźeń pozdźišo, 24.05.2025, zaběraja so tež w Žitawje a we Zhorjelcu ze serbskim filmom. Filmaj „Wuhlo” Maje Nageloweje a Juliusa Günzela a „Łakoma - wuhlu na puću” Reneja Schustera zaběrataj so z tematiku wotbagrowanja a powědataj wo zničenych krajinach, zhubjenej domizny a sylnym spjećowanju.

+++

Po kołopuću Šěracha pućować a mjezynarodny dźeń pčołkow

Na Mjezynarodnym dnju pčołkow, 20. meje přeprošuje towarstwo Šěrachowa towaršnosć pčołkow na pućowanje po kołopuću Šěracha. Günter Sodan budźe po puću zajimawostki wo pčołkach powědać a so tež Hadamej Bohuchwałej Šěrachej wěnować. Wodźenja su w 14:30 hodź. a 18:00 hodź. wot kěrchowa w Budyšinku (při kóždym wjedrje). Přizjewjenja njejsu trěbne.

Pjatk, 23. meje, wot 16 hodź. předstaji towarstwo pčołarstwo a kak so měd dźěła w domje Šěracha w Budyšinku. Informacije poda po naprašowanju Heike Khilan, předsydka towaršnosće hkhilan@schirach-bienengesellschaft.de).

+++

Terminy (wuběr) z protyčki 19.05. do 25.05.2025

póndźelu 19.05.2025

• 10:00 hodź. swjedźenske wotewrjenje składnostnje jubileja 800 lět Kamjenc, wobdźěli so předsyda Dawid Statnik

srjedu, 21.05.2025 

• 10:00 hodź. wopyt zastupjerjow “Matica Slovenská” ze Słowakskeje a Maćicy Serbskeje w Serbskim domje w Budyšinje, wobdźělitaj so předsyda Dawid Statnik a dr. Beata Brězanowa 

sobotu, 24.05.2025

• (njezjawny) 10:00 hodź. Serbopolitiski forum Lěwicy pod hesłom „Kak dale ze Serbskej Lěwicu?“ w Serbskim domje w Budyšinje, w ramiku tuteho přednošuje jednaćelka Judit Šołćina 

23. do 25.05. 100. lětne zetkanje Danow “Årsmøde” w Flensburgu, předsyda Dawid Statnik so wobdźěli