Dźensa, 19.02.2026, je Domowina čěskeho wulkopósłanca z Berlina Jiříja Čisteckého w Serbskim domje witała. Jeho přewodźeštaj zapósłanc Sakskeho krajneho sejma Marko Šiman a frakciski šef CDU Sakskeho krajneho sejma Christian Hartmann. Hosći witaše předsyda Domowiny Dawid Statnik.

W srjedźišću rozmołwy steješe wuske zhromadne dźěło mjez Čěskej a Domowinu ze zaměrom, styki mjez Serbami a Čěskej dale skrućić. Na rozmołwje wobdźělichu so nimo toho Jiři Jonák (wučer čěšćiny w Rěčnym centrumje WITAJ), Pavel Šlechta (wučer na swobodnej wyšej šuli we Wulkej Dubrawje) a dr. Kryštof Peršín (sobudźěłaćer za rěčny marketing w Rěčnym centrumje WITAJ). Woni rozłožowachu swoje puće, kak su serbšćinu nawuknyli a kak Serbow nětko podpěruja.

W rozmołwje su přitomni konkretne móžnosće rozjimali, kak móža čěscy wučerjo a fachowe mocy kubłanje a wučbu w Serbach trajnje skrućić. Wulkopósłanc Čistecký wuzběhny wobstajnu zwólniwosć swojeho kraja, Serbow wosebje při posrědkowanju wučerjow podpěrować. Statnik skedźbni tež na druhe pola zhromadneho dźěła: Tak je Towarstwo přećelow Serbow w Praze trajny móst mjez Čěskej a Serbami. Za wažne ma, towarstwo w swojim dźěle tež materielnje podpěrować. Hosćo přilubichu za to móžnosće pruwować. Dale bychu Serbja rady znowa zastupjerjow čěskeje politiki witali, kaž na př. w lěće 2012 tehdomnišeho ministra Schwarzenberga.

Zjimajo skedźbni Dawid Statnik na wažnosć podpěry a spěchowanja ze stron Čěskeje. Tutej stej wuraz zwjazanosće słowjanskeju ludow, za kotruž so w mjenje Serbow wutrobnje dźakuje.

foto: Domowina/Julian Wjesela