Zašłu wutoru, 14.6., zetkachu so čłonojo asociěrowaneho towarstwa Domowiny „Wendischer Freundes- und Arbeitskreis e.V.” we Łuchowje (Lüchow) po dołhej přestawce koronapandemije dla skónčnje zaso k hłownej čłonskej zhromadźiznje, bilancowachu dźěławosć towarstwa we wólbnej dobje 2019-2022 a wolachu nowe předsydstwo za dobu dalšich třoch lět. Předsyda wostanje Ernst Stelte a jeho podpěruje jako městopředsyda dale dr. Arne Lucke.

Z Łužicy wobdźěli so Werner Sroka jako čestnohamtski społnomócnjeny Domowiny za Wendland a zdobom čłon towarstwa na zhromadźiznje. Wón sposrědkowa postrow předsydy Domowiny, Dawida Statnika, a pokaza na wysoke připóznaće Domowiny za skutkowanje Wendlandskeho přećelskeho a dźěłoweho kruha na slědach słowjanskich stawiznow tuteje kónčiny.

Přitomni přihłosowachu namjetej Wernera Sroki, přichodne lěto deklarować jako „Lěto dr. Kowalewskeho”, dokelž by tón iniciator poćahow a kulturneje wuměny mjez Wendlandom a Serbami dnja 13. Julija 2023 swoje 100. narodniny měł. Za tutón dźeń planuje so wopomnjenske zarjadowanje za jeničkeho nošerja Myta Domowiny we Wendlandźe. Zdobom prócuje so towarstwo wo nowowudaće chroniki Wendlanda słowjanskeho wjesnjanosty Parum Schultze z prěnjeje połojcy 18. lětstotka, kotraž dokumentuje tež wotemrěće tamneje drjewjanšćiny. 

Dalše projekty za klětu buchu předstajene. Z tym prócuje so towarstwo dale wo to, wobydlerjam Wendlanda słowjanske korjenje tuteje krajiny wuwědomić a hordosć na tute předstawizny zbudźić. Na zakładźe kooperaciskeho dojednanja budźe Domowina tute prócowanja dale podpěrować.    

Wobraz:  čłonojo towarstwa po wuspěšnej hłownej zhromadźiznje