Program Domowiny

zamołwitosć – wotewrjenosć – zwjazanosć

Preambla

W lěće 1912 załoži so Domowina jako třěšny zwjazk serbskich towarstwow. To bě wusahowacy podawk w serbskich stawiznach. Z tym so wola k zjednoćenju mocow w serbskim narodnym hibanju jasnje zwurazni a prěni raz zeskutkowni. Po měrliwej rewoluciji 1989/90 je so Domowina k politisce njewotwisnemu a nadstronskemu třěšnemu zwjazkej Łužiskich Serbow[1] přetworiła. Dźensa je Domowina zakońsce připóznata zastupjerka zajimow serbskeho luda. Słužimy swojemu čłonstwu kaž tež cyłemu serbskemu ludej.

Domowina so k Zakładnemu zakonjej wuznawa. W zhromadnosći europskich narodow smy runohódni a zasadźujemy so za swobodu a měr. Wotpokazamy kóždužkuli formu ekstremizma.

Program je zakład za skutkowanje třěšneho zwjazka. Dźěłowe směrnicy konkretizuja zaměry programa. Kóždy, kotremuž na Serbstwje a předewšěm na našej rěči zaleži, je witany so w Domowinje angažować.

Zamołwitosć za serbski lud skutkować wuchadźa z našich stawiznow a z našeho wida na přichod. Wotewrjenosć woznamjenja, zo smě so kóždy z nami za zwoprawdźenje serbskich zajimow zasadźować. Zwjazanosć zwuraznja so w zhromadnym prócowanju wo wobstaće našeho ludu.

Zamołwitosć – wotewrjenosć – zwjazanosć su zakładne hesła jednanja Domowiny.

[1]Kóždežkuli mjenowanje wosobow w tutym teksće poćahuje so runohódnje na wšitke splahi.

Zakładne hesła jednanja Domowiny

Zamołwitosć

Hłowny zaměr našeho zhromadneho skutkowanja je rěč, sydlenski rum, kulturu a identitu serbskeho luda škitać, spěchować a wuwiwać. Rozšěrjenje prawa w serbskich naležnosćach sobu- a samopostajować směć je wažne ćežišćo našeho politiskeho dźěła. Jako zakońsce připóznate zastupnistwo zajimow Serbow jednamy zamołwiće za wšitkich Serbow. Chcemy-li serbstwu přichod zaručić, ma so kóždy jednotliwc po swojich móžnosćach sobu za to zasadźować.

Wotewrjenosć

Domowina je wšitkim Serbam a přećelam Serbow wotewrjena – hač bydla we Łužicy abo zwonka njeje, hač jednotliwc, skupina abo towarstwo. Podpěramy najwšelakoriše móžnosće za wobdźělenje na serbskim towaršnostnym a kulturnym žiwjenju. Smy demokratisce organizowane zastupnistwo serbskich zajimow a jednamy transparentnje. Naši čłonojo su zakład skutkowneje syće serbskeje ciwilneje towaršnosće. Kóždy je přeprošeny sobu skutkować.

Zwjazanosć

Serbske stawizny, kultura, rěč a z toho wuchadźaca narodna identita kaž tež zhromadne narodne prócowanje – wšo to nas zwjazuje. Runohódnosć delnjo- a hornjoserbšćiny jednoća naš lud. Skutkujemy w zmysle tuteje zwjazanosće, kotraž wšitke regiony Łužicy wopřija. Zdobom aktiwity Domowiny najwšelakorišich partnerow we Łužicy a zwonka njeje zwjazuja. Jako zastupjerka serbskich zajimow skići Domowina Serbowkam a Serbam kaž tež přećelam Serbow pomoc při narodnym dźěle.

Serbski lud skrućić, rěč a kulturu wobchować

I. Zwjazk Łužiskich Serbow

Domowina – Zwjazk Łužiskich Serbow – je zastupjerka zajimow serbskeho luda. Jeje čłonske župy, skupiny a towarstwa su nošerjo towaršnostneho žiwjenja w Serbach. Jich dźěło podpěrać je nam bytostny nadawk. Aktiwne sobudźěło jednotliwcow, towarstwow, župow a organow Domowiny při zwoprawdźenju wobzamknjenjow Domowiny je zakład za wuspěšne skutkowanje třěšneho zwjazka. Zhromadnje wabimy za skutkowanje w Domowinje. Kóždy, hač jednotliwc abo towarstwo, je nam jako čłon třěšneho zwjazka witany. Zakład za zhromadne dźěło tworja wustawki a program Domowiny.

II. Politiske zastupnistwo

Domowina zastupuje zajimy serbskeho luda. Tute zastupnistwo je w serbskimaj zakonjomaj kraja Braniborska a Swobodneho stata Sakska zapisane. Wona stara so wo rozšěrjenje prawow a winowatosćow za sobu- a samopostajowanje, předewšěm w serbskich politiskich, kulturnych a kubłanskich naležnosćach. Jednamy ze wšěmi demokratiskimi akterami na komunalnej, krajnej, zwjazkowej kaž tež europskej runinje. Wudźeržujemy  styki k narodnym mjeńšinam a druhim ludam. Při tym je nam wažne, wědu wo Serbach we Łužicy a zwonka njeje dale šěrić.

III. Škit a wozrodźenje serbšćiny

Serbšćina je nam najdrohotniše dźědźinstwo našich prjedownikow. Jeje pěstowanje, škit a wozrodźenje je nam najwažniši nadawk. Pozbudźujemy swójby k pěstowanju serbšćiny. Zasadźujemy so za zwoprawdźenje efektiwnych, rěč spěchowacych naprawow za wšitke generacije, wosebje w pěstowarnjach a šulach. Přewjedźemy a podpěramy naprawy k wožiwjenju serbšćiny wšudźe tam, hdźež wona tuchwilu kruty wobstatk zjawneho žiwjenja njeje. Wutworjenje nowych rěčnych rumow je wažny wobstatk našich prócowanjow.

IV. Kultura a sport, wuměłstwo a wědomosć

Kulturne dźěło, sportowe hibanje, wuměłstwo a wědomosć su wažne stołpy serbskeho žiwjenja a dźěławosće třěšneho zwjazka. Zdobom su akterojo na tutych polach pósłancy našeho luda we Łužicy a zwonka njeje. Podpěramy wuměnu wosebje ze słowjanskim wukrajom a druhimi narodami. Spěchujemy zhromadne dźěło serbskich institucijow z čestnohamtskimi akterami. Zhromadne projekty institucijow wobohaćeja kulturne žiwjenje w Serbach.

V. Nabožno-narodne žiwjenje

Bohate namrěwstwo nabožno-narodnych tradicijow a nałožkow je wobstatk žiwjenja mnoho Serbow. Tute aktiwnje pěstować je wažny zakład za wutworjenje a skrućenje tež narodneho wědomja. Wosady su njeparujomne serbske rěčne rumy, socialne syće a domizna za žiwu wěru Serbow.

VI. Łužica jako hospodarski rum

Hospodarstwo je rjap Łužicy a wobwliwuje njeposrědnje socialne połoženje našeje domizny a serbskeho luda. Ze spěchowanjom serbskeje rěče a kultury zwyšimy atraktiwitu regiona. Wosebje dwu- a wjacerěčnosć je za łužiske předewzaća dobytk. Podpěrujemy naprawy, kotrež pohnuwaja regionalne hospodarstwo k wužiwanju serbšćiny. Zasadźujemy so za kooperaciju Łužicy ze słowjanskim wukrajom, wosebje z Pólskej a Čěskej. Wuprajamy so za łahodny turizm, kotryž zmóžnja hosćom serbsku kulturu we Łužicy zeznać.

VII. Łužica – naša domizna

Łužica je srjedźišćo a domizna Serbow. Zasadźamy so za to, zo by so serbskosć w sydlenskim rumje dale zesylniła a wuwiwała. Dźiwamy na zaměrne zapřijeće serbskeje rěče a kultury do regionalneho, komunalneho a krajneho planowanja. Lětstotk trajace wudobywanje brunicy zawostaji serbskemu ludej wulke straty. Proces strukturneje změny skića nam nowe perspektiwy za wozrodźenje a spěchowanje serbskeje rěče a kultury.

„Trać dyrbi Serbstwo, zawostać!“
Handrij Zejler, 1842