Dźensa zetkachu so županki z Hornjeje a župan z Delnjeje Łužicy, kaž tež zastupjerki a zastupjerjo čłonskich towarstwow a zwjazkow Domowiny na přeprošenje předsydy Dawida Statnika. 14 zastupjerkow a zastupjerjow běchu přitomni.

Na dnjowym porjedźe stejachu mjez druhim jubileje 2026. Županka Budyskeje župy Leńka Thomasowa je hižo na 130. jubilej Marje Grólmusec přeprosyła, kotryž woswjeća z wosebitym zarjadowanjom, sobotu 25.04.2026 w 16 hodź. na žurli Serbskeho domu w Budyšinje.

Předsyda Dawid Statnik skedźbni w tutym zwisku na wuznamjenjenje “Serbski dudak”, kotrež Domowina spožči. Je to móžnosć, wuznamjenić ludźi za jich dołholětnu zasłužbu za serbsku rěč a kulturu, kotrež so na druhe wašnje dotal hódnoćili njejsu.

Dale poskića projektna managerka Domowiny Rejzka Krügerowa – kaž w zašłych lětach – nadregionalnym towarstwam swoju podpěru při organizaciji klětušich projektow. Tež sobudźěłaćerka Claudia Knoblochec podpěruje zaso při stajenju lětakow a plakatow.

Nawodnica za wizuelnu komunikaciju a design, Veronika Bjarš předstaji přitomnym wuslědki dźěłarničkow wo wonkownym wobrazu Domowiny, kotrež je zarjad Domowiny we wjacorych kołach a ze wšelakimi skupinami přewjedł. Hłowne prašenje při tym bě: Kak předstajimy Domowinu a serbski lud? Wona zwěsći, zo bě měnjenje pola wšitkich podobne: Wobdźěleni chcedźa so wšelako zwobraznić. Nimo toho předstaji wona naćisk noweje Domowinskeje webstrony, na kotrymž so tuchwilu intensiwnje dźěła.

Jednaćelka Judit Šołćina pokaza na nowe dźěłowe směrnicy, kotrež je hłowna zhromadźizna lětsa schwaliła. Domowina chce maćernorěčnym kaž tež wuknjacym čłonam towarstwow a župow dalekubłanja w serbšćinomaj na polu stilistiki abo literarneje rěče poskićeć. Čłonojo móža zarjad za to skontaktować.

Naposledk zwurazni předsyda, zo so přez přeprošenja towarstwow a župow, kaž tež Domowinskich skupinow wjeseli, zo by wuměnu dale pěstować móhł: “Towarstwa a župy su zakład našeje dźěławosće. Rady chcu wědźeć, što so na městnje stawa a tež dialog z bazu dale wjesć.”