Čłonojo župneho předsydstwa “Jan Arnošt Smoler” Budyšin schadźowachu so póndźelu popołdnju w šulskim muzeju “Korla Awgust Kocor” w Stróži. Hłownje chcychu wjac wo dźěle čłonskeho towarstwa Budyskeje župy  zhonić. Předsydka towarstwa Radiška, Jana Pětrowa, rozprawješe wo šěrokim skutkowanju towarstwa. Nimo swójskich zarjadowanjow kaž přednoškow a wustajeńcow w domje, podpěruja čłonojo wiki přirody w organizaciji. Hłownje su za serbski program na wikach zamołwite. Za šulerjow zakładneje šule z Malešec poskićuja cyłodnjowski poskitk na temu zahroda. Samo drastu Swjateje Borbory su sebi za adwentny čas přihotować dali. Čłon towarstwa Sieghard Kosel rysowaše, kak je so serbšćiny poněčim ze wsy zhubiła. Kóždy měł na to dźiwać, zo so rěč z jadrowych serbskich kónčin njezhubi.

Motiwatorka ZARI, Raphaela Wićazowa, informowaše wo stawje serbšćiny w Radworju a aktiwitach staršich. Županka Leńka Thomasowa přilubi pomoc při prócowanjach a zakitowanje serbšćiny na šuli. Starši z Minakała na přikład změja bórze crash kurs serbšćiny, kiž ma jim zakłady zbližić, štož ZARI přewozmje. W oktobrje chce motiwatorka z wobdźělnikami po mozaikowej ralley w Njeswačidle pućować. 

W Budyšinje přeprošuje Domowina na nazymski koncert, kiž budźe 8. nowembra w 16 hodź. na žurli Serbskeho domu. Chór Meja budźe z wosebitym programom swojich hosći překwapić.

Županka wuhódnoći na kóncu kubłansku jězbu do Delnjeje Łužicy prajo, zo “je hódne do kónčin našich župow jěć a z čłonami tam wo skutkowanju a wužadanjach rěčeć”. 

Budyšin, 16.09.2025

Katja Liznarjec