Dnja 26.04.2017 jo Domowina peticiskemu wuběrkoju Krajneho sejma Bramborskeje zapódała peticiju. Wóna wobjadna planowanu změnu póstajenja za wucbu serbšćiny a za serbšćinu w bilingualnej wucbje. Mjazy drugim jo se planowało, wjelikosć kupkoweje wucby na minimalnje 12 wuknikow zwušyś, což by wucbu serbšćiny na wětšynje dolnoserbskich šulow wogrozyło. Na protest Serbow jo se ministarstwo wót licby 12 zdalowało. Pśedsedaŕ Domowiny Dawid Statnik groni k tomu: „Informacija wo planowanych změnach, teke wó licbje 12 wuknikow za kupkowu wucbu, jo nas šokěrowała. Z peticiju comy politiski signal pódaś, aby se krajny sejm z toś teju nastupnosću zaběrał. Źo wó pśichod serbšćiny w Dolnej Łužicy.“Zakład peticije jo k prědnemu pisna lisćina, kótaruž je cełkownje 2.249 wósobow z tu- a wukraja pódpisało. Dalej jo se peticiji online-peticija starjejšyskeje iniciatiwy pśipołožyła. Toś tu jo až do 17.04.2017 wěcej ako 20.000 luźi pódpisało. Zběranje pódpismow su pódpěrali Bramborska Serbska rada, starjejšyska iniciatiwa, Serbske šulske towaristwa ako teke Rěcny centrum Witaj a Domowina. “Wjaselim se, až su se starjejše aktiwnje na protesće wobźělili. Jo to wjelicny signal, až jo jim a nam serbšćina wažna. Naźejam se, až politika na to pśi rozsuźenju wó peticiji źiwa”, tak Statnik dalej.