Dźensa wotmě so hłowna, kotraž bě zdobom wólbna, zhromadźizna župy Jakub Lorenc-Zalěski. Wulkotny zazběh do tuteje zmóžnješe najmjeńši cyłk Serbskeho folklorneho ansambla Slepo – a to běštaj najmłódši, wosomlětny čłon Toni Tschöbel ze swojim wučerjom Wolfgangom Kotissekom, kotryž je najstarši čłon ansambla.

Županka Diana Maticowa witaše na zhromadźiznu ze słowami: “Do nětka bě wjeselo, nětko budźe chutnišo”. Nimo 35 wot cyłkownje 42 delegatkow a delegatow, witaše wona tež předsydu Domowiny Dawida Statnika. Tež wokrjesny rada Zhorjelca Stephan Meyer je přitomnych z natočenym postrowom witał, zwjazany z dźakom čestnohamtskim akteram.

Na to předstaješe županka rozprawu wo dźěławosći župy w lětach 2023 do 2025. Župa ma tuchwilu 525 čłonow. We fokusu steješe dźěło na bazy kaž tež dołhodobne zawěsćenje serbskich zarjadnišćow we wobłuku strukturneje změny. Tež jednotliwe skupiny wužichu składnosć, wo swojej dźěławosći na zhromadźiznje rozprawjeć. Tak rozprawješe předsydka Angelika Balccyna wo aktiwitach Domowinskeje skupiny Trjebin. W tutej angažuje so tuchwilu 49 sobuskutkowacych. Woni přewjeduja mj. dr. wječorki na Šusteroc kachlowej ławce, nalětnje koncerty abo pěstuja serbske nałožki kaž kopicu znatych wokoło jutrow. Předsydka Angelika Balccyna zakónči z přećemi: “Přeju wam móc za wuchowanje našeje rěče, našich nałožkow a tradicijow.”

Stephanie Bierholdtec předstaješe jako předsydka dźěławosć Serbskeho folklorneho ansambla Slepo. Wažny zaměr towarstwa je prezentacija wobšěrneje folklory ze swojeje kónčiny. Kaž wona wuwjedźe, je wažny nadawk ansambla dorost namakać. W hudźbnej skupinje to derje funguje, tež dźakowano Wolgangej Kotissekej.

Prěni raz počesćichu na hłownej zhromadźiznje čestnohamtskich čłonow, kiž so hižo dołholětnje angažuja. Ze zapodatych namjetow čłonskich towarstwow je župne předsydstwo třoch za to wuzwoliło:

Brigitte Steinkowa z Wochozy: Wona angažuje so za zdźerženje serbskosće, za dorost; je aktiwna w Šwjelic bróžni a wita hosći w parku błudźenkow hdys a hdys w Hochožanskej drasće.

Gertrud Hermašowa z Rowneho: je aktiwna w předsydstwje Njepilic towarstwa; podpěruje rěčne kursy; pěstuje nałožki; přihotuje zarjadowanja na Njepilic dworje; wita w Slepjanskej drasće; podawa měsačne bibliske hodźiny a je nimo toho tež w mnoho dalšich towarstwach aktiwna.

Wolfgang Kotissekz Brězowki: swjeći lětsa 50lětny jubilej jako aktiwny čłon Serbskeho folklorneho ansambla Slepo; je wot spočatka sem hižo čłon; je hudźbnik ale tež nawoda, hraje a podawa husle a huslički a dudy; je nawoda hudźbnych skupin; pisa aranžementy; běše tež organizatoriski nawoda a tež předsyda towarstwa.

W swojej narěči hódnoćeše předsyda Domowiny Dawid Statnik njesprócniwy angažement w Slepjanskej kónčinje: “Njeznaju žanu druhu župu, kotraž tajku mnohotnosć w rozprawje a towarstwach wotbłyšćuje kaž waša župa.” Na kóncu swojeje narěče wupraja předsyda próstwu na přitomnych: “Wy sće baza našeho jednanja a wjeselu so přez waše ideje a namjety. Tež přez kóžde waše přeprošenje so wjeselu.”

Wólby

Za županku wopodstatnichu přitomni dotalnu, Dianu Maticowu (34/35). Wona běše jenička kandidatka. Tež dotalnu naměstnicu, Stephanie Bierholdtec, delegaća wopodstatnichu (35/35). Do jednaćelskeho předsydstwa wolachu so: Ingrid Lehnikowa (31/35), Sylvia Panošyna (34/35) a Simona Urbankowa (34/35). Do rozšěrjeneho předsydstwa wolachu so: Hannelore Balkowa (34/35), Angelika Balccyna (34/35), Angelika Bertkowa (32/35), Getrud Hermašowa (33/35), Wolfang Kottissek (35/35), Sandra Lemkowa (31/35), Pascal Noack (32/35), Petra Rübesamowa (31/35), Emilie Šusterec (32/35), Dorit Štetnišec (30/35), Nadine Stelcerowa (30/35) a Kati Strukowa (31/35). Do rewizijneho wuběrka wolachu Manfreda Hermaša (35) a Heidemarju Richtarjowu (34/35).

Ćežišća za dobu 2025-2027 “Nowe puće kročić”

Njeje lochki čas, tak rěka z dotalneho předsydstwa w předłoze za nowe ćežišća. Jedne wužadanje je, zo chcedźa za dalšimi dalšimi spěchowanskimi móžnosćemi pytać. Přičina je, zo su spěchowanske srědki brunicowych zawodow wučerpane. Konkretne nadawki nimo dźěła na bazy su na př. zawěsćenje dołhodobneje dźěławosće župy po jeje wustawkach, podpěra projektow w ramiku strukturneje změny a zdźerženje a wutworjenje rěčnych rumow.

Nimo toho hłowna zhromadźizna dweju nowych čłonow přiwza. Stej to spěchowanske towarstwo parka Błudźenkow we Wochozy kaž tež tamniše wjesne towarstwo. Předsyda towarstwa Peter Scholze bě zbožowny: “Wjeselu so, zo smy nětko čłon župy. Pěstujemy hižo dołho zhromadne dźěło ze Serbami tu we wokolinje. Chcemy serbsku rěč a kulturu w parku dale spěchować.” Tež Mario Weier, zastupjer wjesneho kluba Wochozy zdźěli: “Naše towarstwo smy 2006 załožili a mamy 40 čłonow. Hajimy serbske nałožki.”

fota: Domowina/Božena Šimanec

foto rozšěrjene předsydstwo župy JLZ_Diana Maticowa, Sandra Lemkowa, Dorit Štetnišec, Angelika Bertkowa, Emilie Šusterec (zady), Angelika Balccyna, Nadine Stelcerowa (zady), Hannelore Balkowa, Wolgang Kotissek, Kati Strukowa, Getrud Hermašowa, Dawid Statnik (wotlěwa) (na wobrazu faluje: Pascal Noack)