Stipendije za kurs čěšćiny w Čěskej

Štóž ma zajim na rěčnym kursu čěšćiny w Praze (16.7.–13.8.2026) abo Čěskich Budějovicach (02.8.–24.8.2026), njech w Rěčnym centrumje WITAJ hač do 15.3.2026 swoje přizjewjenske podłožki woteda (Póstowe naměsto 2, 02625 Budyšin abo sekretariat@witaj.domowina.de). Wotpowědny formular a dalše informacije su na internetowej stronje www.witaj.de přistupne.

+++

33. serbske jutrowne wiki

Spěchowanski kruh za serbsku ludowu kulturu z.t. přeprošuje 28.2. a 1.3.2026 na 33. serbske jutrowne wiki do Budyskeho Serbskeho domu.  

Sobotu a njedźelu móžeće wot 10.00 do 18.00 hodź. debjerjam na žurli domu přihladować a sebi najrjeńše jutrowne jejka kupić. Maće wězo tež składnosć, so sami w debjenju jutrownych jejkow wuspytać. Dźěći su nimo toho na paslenje a walkowanje jutrownych jejkow prošeni. Nimo debjerjow jutrownych jejkow wustajeja tež dalše wuměłče rozdźělne ručne dźěła kaž wudźěłki ze škleńcy, abo wušiwanki. Runje tak so sobudźěłaćerjo Smolerjec kniharnje na kupcow w Serbskim domje wjesela.  

A štóž chce trochu wodychnyć, tomu njech po hołku a tołku na štwórtej etaži horcy kofej a słódny tykanc abo tež dobra kołbaska zesłodźi.  

Tuž njedajće so prosyć, přijědźće do Budyšina. Wjeselimy so was! 

+++

Wuběr terminow 02.-08.02.2026

srjedu, 04.02.2026 

• wot 15:30 hodź. RĚČna hodźina za dorosćenych, Nawjes 26, 02627 Radwor, informacije poda po naprašowanju Raphaela Wićazowa, rěčna motiwatorka projekta ZARI  
• 16:00 hodź. wuběrk doma Měrćina Nowaka-Njechoŕnskeho w Serbskim domje w Budyšinje, informacije poda na naprašowanje Clemens Škoda

štwórtk, 05.02.2026  

• wot 10:30 hodź. spěwna zhromadnosć w Ptačecach, Wasapuć 11 w Ptačecach, informacije poda po naprašowanju Marija Šołćic rěčna motiwatorka projekta ZARI 

sobotu, 07.02.2026

• 150. zapust w Janšojcach, mj. dr. wobdźěli so předsyda Dawid Statnik