Lubi čłonojo, česćeni hosćo a internetni wopytowarjo,

jako předsyda směm Was wutrobnje na našej internetnej stronje witać. Wjeselu so nad Wašim zajimom za našu narodnu organizaciju.

Domowina ma něhdźe 7300 čłonow, kiž su w pjeć župach, mnohich Domowinskich skupinach a třinaće nadregionalnych specifiskich towarstwach organizowane. Naši sobustawojo tworja zakład našeho skutkowanja. Kóžde 2. lěto wotměje so hłowna zhromadźizna, kóžde 4. lěto wola jeje delegaća zwjazkowe předsydstwo. Tute rozsudźa mjez zhromadźiznami wo našej dźěławosći, při kotrejž móžemy so we wšědnym dźěle na zarjad Domowiny spušćeć. Sobudźěłaćerjo zarjada, wosebje regionalni rěčnicy w Budyšinje, Choćebuzu, Chrósćicach, Slepom a Wojerecach, steja Wam při wšěch prašenjach serbskeho zjawneho žiwjenja rady k dispoziciji.

Přeju Wam wjele wjesela při wopyće našeje wirtuelneje Domowiny a strowju Was wutrobnje

Dawid Statnik
předsyda Domowiny


Ze swojim nahubnikom pokazujemy: My so mjez sobu škitamy. My chcemy zjawne žiwjenje pod wuměnjenjemi pandemije zmóžnjeć. Z wotstawkom dźiwamy na druhich. Jako třěšny zwjazk smy w meji pola šwalče za wolenych čestnohamtskich čłonow w gremijach nahubniki ze serbskim signetom skazali. Lěćo je dawno nimo, nětko smy z „druhej žołmu” konfrontowani. Ze solidaritu a z mjezsobnym respektom budźemy tute wužadanje hromadźe zmištrować. Smy na polu digitalneje komunikacije tež w Serbach wjele přiwukli. Přiwšěm wostawaja naše domy pod předpisami hygieny přistupne – z přizjewjenjom. Doniž njebudźe pandemija nimo.