Obersorbische Sprachkommission

Hornjoserbska rěčna komisija (HRK) je wot Maćicy Serbskeje powołany a awtorizowany gremij za kodifikaciju spisowneje hornjoserbšćiny. Wona zaběra so ze wšěmi zjawami spisowneje rěče, hdźež je potrjeba za regulowanje a normowanje. Čerpajo z wuslědkow rěčespytnych slědźenjow a wobkedźbujo rěčnu praksu wudźěła wona obligatoriske prawidła a doporučenja za praktiske wužiwanje spisowneje hornjoserbšćiny. Zdobom ma wona hladajo na změny w rěčnej praksy na to dźiwać, zo so dotalne postajenja přepruwuja a w datym padźe nowym wobstejnosćam přiměrja. Z tym chce HRK k skrućenju a dalewuwiwanju spisownorěčneho standarda přinošować.
Jeje nadawki wobjimuja rozrisanje ortoepiskich, prawopisnych, interpunkciskich, morfologiskich, leksikaliskich a syntaktiskich prašenjow.
Wobzamknjenja rěčneje komisije publikuja so w formje wosebitych přiručkow abo jednotliwych přinoškow w nowinach a časopisach a wotbłyšćuja so w słownikach, terminologijach a gramatikach, kotrež su so do wudaća w HRK přepruwowali.
Dźěławosć HRK je wusměrjena na praktiske nałožowanje spisowneje rěče. Tuž słušeja do rěčneje komisije nimo fachowcow na polu serbskeho rěčespyta (wědomostnicy Serbskeho instituta w Budyšinje a Instituta za sorabistiku w Lipsku) tež sobudźěłaćerjo tajkich serbskich zarjadnišćow, w kotrychž hraje nałožowanje a rozšěrjenje hornjoserbskeje spisownej rěče centralnu rólu: serbskich kubłanskich institucijow (šule a Rěčny centrum WITAJ) a serbskich medijow (knižny wobłuk LND, nowiny a časopisy, rozhłós).

Die Arbeit der Obersorbischen Sprachkommission wird gefördert durch die Stiftung für das sorbische Volk, die jährlich auf der Grundlage der beschlossenen Haushalte des Deutschen Bundestages, des Landtages Brandenburg und des Sächsischen Landtages Zuwendungen aus Steuermitteln erhält.