Rozprawa dźěławosće sekcije stawizny 200820/09

Wot lońšeje Hłowneje zhromadźizny MS sem je stawizniska sekcija jedne zarjadowanje sobu přihotowała a wuhotowała: kolokwij k 100. narodninam Pawoła Neda, kiž wotmě so loni nazymu w Budyšinje. Hromadźe z předsydku sekcije ludowěda/muzejownistwo dr. Ines Kellerowej je městopředsydka stawizniskeje sekcije Trudla Malinkowa zarjadowanje přihotowała; předsyda sekcije dr. Edmund Pjech a čłonka sekcije dr. Annett Brězanec staj přednošowałoj.

Jako sekcija zešli smy so w minjenym lěće jedyn raz, loni spočatk decembra. Tam je so změna w nawodnistwje sekcije stała: Dotalny předsyda dr. Edmund Pjech přewza městopředsydstwo a dotalna městopředsydka Trudla Malinkowa přewza předsydstwo. Tam smy sej tež přichodne předewzaća dorěčeli.

To je sprěnja zarjadowanje k 20lětnej róčnicy přewróta w Serbach. Tute wotměje so pod temu „Nalěćo w nazymje. Serbja a lěto 1989“ dnja 13. nowembra we wulkej žurli w Dźiwadle na Hrodźe. Stawiznar dr. Timo Meškank z Lipska budźe wo přewrótowych podawkach w Serbach a prócowanjach wo wobnowjenje Domowiny přednošować. Předstajić chcemy tež někotre filmowe wurězki z tehdyšich serbskich zarjadowanjow. Přednošk so wobrubi z hudźbu Jura Mětška. Naše zarjadowanje wotměje so we wobłuku rjada zarjadowanjow k přewrótej, kotrež wšelake institucije města Budyšina pod hesłom „Herbsthoffnung 89 / Nadźija nazymy 89“ přihotuja. Přednošk wotměje so w serbskej rěči, zdobom poskićamy simultany přełožk do němčiny.

Dale smy sej za dlěšu dobu předewzali, město wulkich kolokwijow radšo zarjadować rjad přednoškow pod titulom „Maćična akademija“. Tu měli serbscy, němscy a tež wukrajni wědomostnicy a studenća składnosć dóstać, předstajić swoje slědźenja k wšelakim serbskim stawizniskim a dalšim sorabistiskim temam. Zarjadowanja měli wječor być a so snadź trójce wob lěto wotměć. Za to pytamy hišće přihódnu rumnosć w Budyšinje. Tež namjety zajimawych referatow a referentow rady přijimam. Z rjadom chcemy po přewrótowym zarjadowanju, po móžnosći w přichodnej zymje, započeć.

Naspomnić hišće chcu, zo ma stawizniska sekcija – najskerje nic jako jenička – problem přemało sobustawow. Na sekcijskim posedźenju běchmy sedmjo. Rady bychmy dalšich, wosebje tež młódšich čłonow, mjez nami witali.

 

Trudla Malinkowa