Rozprawa dźěławosće sekcije stawizny 2013/2014

Wot lońšeje hłowneje zhromadźizny Maćicy Serbskeje je stawizniska sekcija přewjedła štyri zjawne zarjadowanja w rjedźe Maćičneje akademije. Běchu to:

1. 11. apryla 2013 přednošowaše młody serbski stawiznar Měrćin Brycka z Kubšic na temu: „Zwischen Statuswahrung und Marginalisierung. Die Oberlausitzer Sechsstädte von der Krise des Böhmischen Ständeaufstandes bis zum Ende des Dreißigjährigen Krieges“. Za swoje magisterske dźěło wo tutej temje bu Měrćin Brycka 2011 wuznamjenjeny z Mytom Hermana Knothy Hornołužiskeje towaršnosće wědomosćow w Zhorjelcu.

2. 1. oktobra 2013 mějachmy wukrajneho referenta. Dr. Alexander Maxwell, stawiznar a docent na University of Victoria we Wellingtonje, Nowoseelandskej, předstaji temu „Tschechen und Sorben an der Pariser Friedenkonferenz 1919“. Tutón přednošk zarjadowachmy zhromadnje z redakciju Rozhlada. Wón wotmě so wuwzačnje w Serbskim domje.

3. Składnostnje 300. narodnin Jana Michała Budarja zaběraše so dr. Jens Buliš, teologa a cyrkwinski stawiznar z Chrósćic, na próstwu našeje sekcije z tutym dobroćelom Serbow a jeho załožbu. Rezultaty swojeho slědźenja předstaji dr. Buliš 21. nowembra 2013 w přednošku „Die Meißnische und Oberlausitzer Unterstützungs-Casse armer Wenden. Zum 300. Geburtstag ihres Stifters Johann Michael Buder (1713–1789)“. Kaž je słyšeć, budźe referent swoje wuslědki tež hišće w pisomnej formje zjawnosći předstajić.

4. 30. januara 2014 poda Trudla Malinkowa pod temu „Serbske pomniki. Materielne swědki narodneje identity“ přehlad wo stawizniskim wuwiću na tutym polu wot započatkow hač do přitomnosće.

Jako přichodny je planowany za 10. apryl wječork zdirektorom Serbskeho institutaprof. dr. Dietrichom Šołtu, kotryž porěči wo zažnych lětach spisowaćela Jurja Brězana. Na jeho přednošk Brězans frühe Jahre (bis 1950)hižo nětko wšěch Maćicarjow wutrobnje přeprošuju.

Rjad Maćičneje akademije, kotryž smy nazymu 2009 załožili,  je so w zjawnosći derje přiwzał. Při mjenowanych štyrjoch zašłych zarjadowanjach naličichmy najmjenje 21, najwjace 35 wopytowarjow, z čimž móžemy dosć spokojom być. Tuchwilu mamy nadwahu na referatach w němskej rěči, dźiwamy pak na to, po móžnosći něhdźe połojcu zarjadowanjow w serbskej rěči přewjesć. Wutrobnje dźakować chcu so na tutym městnje Malinkec a Lukašec mandźelskimaj, kotřiž nas z Maćičnej akademiju zwólniwje do swojeho hosćenca „Wjelbika“ přiwzachu a nas w nim přeco přećelnje hospoduja.

Pokazać hišće na to chcu, zo so sobustawy stawizniskeje sekcije tež zwonka oficialnych Maćičnych zarjadowanjow wo šěrjenje wědy wo serbskich stawiznach prócuja z tym, zo před serbskim kaž němskim publikumom na wsach a w towarstwach přednošuja a w nowinach a časopisach stawizniske přinoški publikuja. Spektrum tuteje přednošowanskeje a publikacijskeje dźěławosće je jara šěroki a so z wulkim angažemantom wukonja. Za to wšěm wutrobny dźak!

Stawiznisku sekciju nawjedujetaj Trudla Malinkowa jako předsydka a dr. Edmund Pjech jako městopředsyda. Sekciske zhromadźizny wot lońšje hłowneje zhromadźizny MS njejsmy přewjedli. Njemějachmy to za trěbne, dokelž so drobne přihotowanske dźěła w mjezsobnym zwisku dorěčachu. Naš hižo w rozprawach zašłych lět mjenowany problem, zo ma sekcija mało sobustawow, dale wobsteji. Wjeselimy so, zo je so nam nětko z Lubinu Malinkowej młoda serbska stawiznarka přidružiła. Rady bychmy dalšich młódšich čłonow kaž tež serbskich stawiznarjow a wučerjow stawiznow mjez nami witali.

Na kóncu hišće krótki wuhlad na přichodne lěto: Konferency abo podobne wosebite zarjadowanja tuchwilu předwidźane njejsu. Planujemy pak zaso tři přednoški Maćičneje akademije. Štóž ma nastupajo temy abo referentow namjety abo přeća, njech nam to prošu zdźěli.

Trudla Malinkowa, předsydka

15. 03. 2014