2019/2020

Rozprawa sekcije ludowěda/muzejownistwo 2019/2020

Muzealne dźěło a ludowědne slědźenje stej hłownej nadawkaj sekcije. Wjetšina z 15 čłonow ma tež powołansce na někajke wašnje z tym činić. Tak koncentruje so maćična sekcija bóle na to, tworić slědźersku a muzejowu syć. K tomu słuža tak mjenowany Dźěłowy kruh łužiskich muzejow a muzealnych zarjadnišćow a jeho kóždoletne ekskursije do jednotliwych wustajenišćow ze serbskej tematiku, kotrež sekcija organizuje. Loni pobychmy dnja 17.6.2019 we wosebitej wustajeńcy wo Wochožanskich Serbach we wopytowarskim centrumje Parka błudźenkow we Wochozach. Tomu přizamknyštej  so přednošk a diskusija nastupajo nowy projekt Zwjazka za serbski kulturny turizm z.t., turistisku kartu „Ducy po serbskej Łužicy”. Přitomni skedźbnjachu na wažnosć runohódneho wužiwanja serbšćiny na dwurěčnej karće tež hladajo na słowjanskich susodow, kiž so w přiběracej měrje za łužisku jězorinu zajimuja. Lětsa pandemije dla zetkanje muzejownikow wupadnje.

Dalši projekt sekcije bě zwjazany z wubědźowanjom Saskski fond „Čiń sobu”. Zapodachmy ideju dokumentowanja serbskeje muzealneje zběrki Helmuta Kurja w Blunjanskej narěči, kiž słušeše k dobyćerskim projektam. Abiturientka z Ćiska měješe znateho serbskeho zběraćela a brašku z Blunja přez dlěšu dobu interviewać, jeho rozprawy k jednotliwym muzealnym objektam w blunjanšćinje z nahranskim aparatom a z kameru zapopadnyć a zestajić přehlad z krótkim wopisanjom zběrki. Serbske drasty, fota a dalše materielne časowe swědki wobhladuja so jako špihel serbskich stawiznow wsy a Wojerowskeho regiona. Přez  rozmołwy měješe so młoda Serbowka z Blunjanskej serbskej narěču a specielnymi zapřijećemi ratarskich gratow a serbskeje drasty a z regionalnymi stawiznami a wašnjemi zeznajomnić, zo by so wěda na młodu generaciju dale dała. Bohužel bu projekt dotal jenož podźělnje realizowany. Hubjeny strowotny staw zběraćela a lětuša pandemija dotal pokročowanju zadźěwachu. Nadźijamy so, zo so pozdźišo na projekće dale dźěła. Helmut Kurjo (*1935) wobhladuje so jako jedyn z poslednich znajerjow Blunjanskeje narěče a Wojerowskich wašnjow a serbskeje drasty.

A.Pawlikowa, předsydka