2017/18

Rozprawa Hornjoserbskeje rěčneje komisije 2017/18

 

Hornjoserbska rěčna komisija je so w lěće 2017 na 14 čłonow zredukowała. Dwě čłonce stej ju wopušćiłoj, Janka Pěčkojc de Levano je hižo z kóncom lěta swoje čłonstwo złožiła, město njeje je LND namjetowało Saru Mičkec, redaktorku Rozhlada, na čož je ju předsydstwo Maćicy do HRK powołało. Po połstalětnym skutkowanju je HRK tež wopušćiła dr. Irena Šěrakowa. Woběmaj so wutrobnje dźakujemy za dołholětne spomóžne dźěło.

Hornjoserbska rěčna komisija je so w l. 2017 trójce k wuradźowanjam zešła: 20. januara, 5. meje a  1. septembra. Jedne planowane posedźenje HRK (10. nowembra) dyrbješe dla mnohich zamołwjenjow wupadnyć. Tute smy wčera nachwatali.

Po tym, zo běchmy 20. januara wobzamknyli powšitkowne prawidła prawopisa, kiž smy w běhu lěta 2016 přediskutowali, smy na posedźenjach wobjednawali prawidła hromadźe- a róznopisanja. Tute hač dotal nihdźe eksplicitnje a zjawnje rjadowane njejsu. Diskusiju njejsmy hišće cyle zakónčili, to pak bychmy na přichodnym posedźenju zdokonjeć móhli. Na předłohach za prawidła je w nadawku HRK zaso sobu dźěłała poradźowarska skupinka. Tež tuta je so pomjeńšiła a wobsteješe z Tima Meškanka, Michała Nuka, Sonje Wölkoweje a Edwarda Wornarja. W tutym kruhu smy so w lěće 2017 dwójce zešli (10. meje a 16. awgusta).

Z planowanych štyrjoch posedźenjow klawsurneje skupiny dyrbještej dwě chorosće resp. terminoweje kolizije dla wupadnyć.

Zaměry posedźenjow su so we hłownym docpěli. Wuslědki posedźenjow poradźowarskeje skupiny kaž tež posedźenjow HRK su so kaž přeco nadrobnje protokolowali – na tutym městnje njech je tež protokolowarjam dźakowane. Wšě wobzamknjenja je Timo Meškank do naćiska cyłkownych prawidłow zadźěłali, kotrež so na te wašnje krok po kroku wudospołnjeja a polěpšeja.

 

dr. habil. Sonja Wölkowa

předsydka

Budyšin, 17.03.2018