Rozprawa předsydy Maćicy Serbskeje na lěto 2012/13

Předsydstwo Maćicy, do kotrehož słušeja dr. Anett Brězanec, Jěwa-Marja Čornakec, Jurij Łušćanski, Janka Pěčkec de Lévano, dr. Christiana Piniekowa, dr. Anja Pohončowa Pětš Šurman jako předsedar Maśicy a Jan Malink, schadźowaše so wot zańdźeneje hłowneje zhromadźizny šěsć króc a to přeco z dobrym abo jara dobrym wobdźělenjom. Podam přehlad wo temach, kotrež zhromadnje wobdźěłachmy.

Delnja Łužica

Pokročowachmy swoju dołholětnu tradiciju, zo přewjedźemy jedne posedźenje wob lěto w Choćebuzu, hźež wopytamy serbsku instituciju. W septembrje 2012 zetkachmy so ze šulskej wjednicu Delnjoserbskeho gymnazija, knj. Hillojc. Přeswědčichmy so so wo intensiwnym, ale tež ćežkim dźěle na tutym wukubłanišću. Pola braniborskeje ministerki Münch zapodachmy protest dla wotpohladanych skrótšenjow při Witaj-projekće. Hłowne dźěło w Delnjej Łužicy wšak wukonja Maśica, wot kotrejež słyšimy wosebitu rozprawu.

Domowina a kulturna politika

W oktobrje 2012 swjećeše Domowina, kotrejež sobustaw smy, stolětny jubilej swojeho wobstaća. Maćica běše sobuwuhotowar wědomostneje konferency k jubilejej. Zdobbom poda wona logistisku a wobsahowu pomoc při spominanju na wobsadźenje stareho Serbskeho doma přez Gestapo, kotrež wotmě so 15.09.2012. Za tydźeń budźe Hłowna zhromadźizna Domowiny, na kotrejž wobdźěla so jako naši delegaća Chr. Piniekowa, dr. P. Šurman a M. Kowar. Je wobžarować, zo nimamy swojeho kandidata za zwjazkowe předsydstwo.

W tutym zwisku něšto słowow ke kulturnej politice. Po lětadołhich diskusijach, kotrež wjazachu wjele energije a wjedźechu hač k mjezsobnej njedowěrje, je zaćahnył měr po tym puću, zo je wšo při starym wostało. My jako Maćica stejimy dale za našim reformowym konceptom, zo ma so załožba přerjadować na zarjadnišćo, kotež wobhospodarja statne přiražki, a zo maja so kulturnopolitiske nadawki w zmysle samopostajenja serbskeho luda na Domowinu a na serbske towarstwa přenjesć. Za nas je njezrozumliwje, zo ani tuta skromna reforma, kotraž njepłaći žane pjenjezy, móžna njeje.

Słowjanski wukraj

Maćica bě dóstała přeprošenje na zetkanje Maćicow 7. decembra 2012 w Ljubljanje. Bohužel njemóžachmy so wobdźělić. Planowane je dalše zetkanje w awgusće 2013 w Martínje składnostnje 1150. róčnicy přichada Cyrila a Metoda na Morawje, hdźež chcemy so wobdźělić. By derje było, hdy by so nam poradźiło, słowjanske zwiski zaso bóle wutwarić.

Skutkowanje w Serbach

Po Maćicy je towarstwo Cyrila a Metoda druhe najstarše serbske towarstwo. Wone swjeći lětsa swój 150. jubilej. Běchmy sobunošerjo jubilejneho zarjadowanja 23. februara 2013 ze swjedźenskej akademiju a Serbskim muzeju.

Maćica je zaso wupisała swoje dorostowe myta: Hórnikowe za hornjoserbskich gymnaziastow, Šwjelowe za delnjoserbskich a Mukowe za studentow. Smy wćipni, hač dóńdu powabjenja. Posledni termin wotedaća je 30. junij 2013.

Maćica je wužiwała móžnosć, namjetować Jurja Łušćanskeho jako čłona wuběrka za myto Jakuba Barta Ćišinskeho.

Předsydstwo je so wobroćiło na Drježdźansku měšćanostku Helma Orosz, zo by so zdźeržał muzej Kraszewskeho w Drježdźanach. Pólski spisowaćel bě Maćicy wuznamny stipendij za serbski dorost darił, na čož bu čestny čłon našeho towarstwa.

Skónčnje realizowachmy namjet zańdźeneje hłowneje zhromadźizny, so wobroćić na město Budyšin, zo by so při architekturje noweho Lawskeho centra dźiwało na architekturu stareho Serbskeho doma. Na naš list dóńdźe přećelna wotmołwa měšćanosty a dóńdźe k rozmołwje mjez zamołwitymi města a dr. H. Mirtschinom, kiž je připóznaty fachowc. Tola wšo wosta bjez konkretnych wuslědkow.

Zaběrachmy so z kulturnostawizniskim kalendarijom, kiž ma za lěta 2015-2019 wuńć. Přepodachmy naležnosć nakładnistwu k dalšemu wobdźěłanju.

Mějachmy rozmołwu z redakciju Rozhlada, zo bychu so wšelake prašenja wokoło darnych a wukrajnych abonentstwow rjadowali.

Maćične naležnosće

Smy zdobyli knjeni W. Šołćinu za zrjadowanja wšelakich našich pisomnych naležnosćow. (sobustawstwo, listowanje atd., pozdźišo tež internet.). Změjemy w přichodnych tydźenjach našu nowu stwu zarjadować, kotruž sej dźělimy z Serbskim ewangelskim towarstwom a ze šefredakciju Katolskeho posoła. Dźěłamy dale na nowej internetnej prezentaciji našeho towarstwa.

Dźakuju so wšěm, kiž su přewzali nadawki za Maćicu a z tym za naš serbski lud.

09.03.2013

Jan Malink