2022/2023

[Sie können sich den Text mit der sotra.app übersetzen lassen]

Rozprawa stawizniskeje sekcije 2022/23

Wot lěta 2009 do 2020 přeprošowaše stawizniska sekcija trójce wob lěto – w nazymje, zymje a nalěću – na Maćičnu akademiju do Budyskeho „Wjelbika“. Prěnje tajke zarjadowanje wotmě so w oktobru 2009, poslednje w februara 2020, wobě připadnje ze samsnej referentku Lubinu Malinkowej. Dalši, hižo zjawnje propagowany přednošk w měrcu 2020 dyrbješe so wudyrjenja pandemije dla krótkodobnje wotprajić. Tež w sćěhowacymaj lětomaj znjemóžni pandemija dale wjedźenje rjadu.

Po mjeztym třilětnej přestawce dowolće krótki rezimej rjadu Maćičneje akademije. Dohromady je so 32 zarjadowanjow, 17 serbskich a 15 němskich, wotměło. Rěč přednoškow bě podrjadowana, wuměnjenje pak bě serbska tema. Wopytowarjow mějachmy najwjac 55, najmjenje 9, přerěznje wokoło 20. Jako referenća wustupowachu starši wupruwowani přednošowarjo kaž tež – a na to wosebje dźiwachmy – młodźi absolwenća, kotřiž dóstachu tak składnosć, swoje dopóznaća z magisterskich abo druhich slědźerskich dźěłow zajimowanemu připosłucharstwu předstajić. Wjacori z nich su mjeztym w serbskej wědomosći a zjawnosći znaći a aktiwni.

Referentow a temy přednoškow dorěčachmy sej spočatnje, to rěka hač do 2011, na posedźenjach stawizniskeje sekcije. W dalšich lětach stachu so wothłosowanja ertnje mjez předsydku, městopředsydu Edmundom Pjechom a čłonku sekcije Annett Brězanec w Serbskim instituće, w kotrymž wšitcy třo jako wědmostni sobudźěłaćerjo skutkowachu. Wo organizaciju a zjawnostne dźěło postara so předsydka.

Zjimajo hodźi so rjec, zo je stawizniska sekcija z rjadom Maćičneje akademije dlěje hač dźesać lět dołho młodym kaž staršim slědźerjam składnosć k zjawnej prezentaciji dała a tak z wotměnjawym programom k duchowno-kulturnemu žiwjenju w Serbach přinošowała.

Nětko po pandemiji je nowy zazběh w skutkowanju stawizniskeje sekcije trěbny – a tutón dyrbjał přińć wot noweho nawodnistwa. Wjeselu so, zo je so na posedźenju tutón tydźeń, 14. měrca, poradźiło, nowe nawodnistwo sekcije wuzwolić. Dotalna předsydka Trudla Malinkowa a dotalny městopředsyda Edmund Pjech, kotrajž staj sekciju wot 2008 do 2023 nawjedowałoj, hižo njekandidowaštaj. Nawodnistwo staj přewzałoj Měrćin Brycka jako předsyda a Lubina Malinkowa jako městopředsydka. Šesćo přitomni su jeju na zhromadźiznje jednohłósnje wuzwolili. Woběmaj wuprajam z tutoho městna hišće raz dźak za zwólniwosć, nadawk přewzać a jako zastupjerjej młódšeje generacije dźěło sekcije dale wjesć.

Dale dźakować chcu so tež wosebje dotalnemu městopředsydźe Edmundej Pjechej a čłonomaj sekcije Annett Brězanec a Janej Malinkej, kiž su moje dźěło jako předsydka w minjenych 15 lětach spušćomnje přewodźeli a z radu a skutkom podpěrali.

Nowymaj nawodomaj Měrćinej Brycce a Lubinje Malinkowej přeju dobrych sobuwojowarjow, wjele wutrajnosće, rjane wuspěchi a při wšěm tež wjele wjesela do jeju skutkowanja we wobłuku stawizniskeje sekcije Maćicy Serbskeje.

 

Trudla Malinkowa

předsydka stawizniskeje sekcije w lětach 1991–1995 a 2008–2023