Rozprawa předsydy Maćicy Serbskeje 2014/15

Předsydstwo Maćicy schadźowaše so wot zańdźeneje hłowneje zhromadźizny 15. měrca 2014 šěsć króć. Jemu přisłušeja nimo předsydy městopředsyda Marko Kowar, pšedsedar Maśicy dr. Pětš Šurman, zamołwita za protokol Janka Pěčkojc-de Lévano, zamołwita za financy Jěwa-Marja Čornakec, zamołwity za zwiski z wukrajom Jurij Łušćanski, zamołwita za čłonstwo dr. Annett Brězanec, w čitarskej přiradźe SN skutkuje Marka Cyžowa a za internet zamołwita je Anja Pohončowa. Podam swoju rozprawu pod dwěmaj aspektomaj: skutkowanje w Serbach a towarstwowe naležnosće.

A.        Skutkowanje w Serbach

1.        Wažne ćežišćo za našu dźěławosć su dorostowe myta: Hórnikowe za hornjoserbskich gymnaziastow, Šwjelowe za delnjoserbskich a Mukowe za studentow. Tute so na lěto 2014/1015 wupisachu, při čimž so wustawki trochu změnichu z tym, zo zapisa so móžnosć spěchowanskich mytow.

2.        Po wobzamknjenju zańdźeneje Hłowneje zhromadźizny stajichmy próstwu wo sobustawstwo w towarstwje „Serbski institut”. Tomu je so wotpowědowało, tola nětko leži před nami nadawk, postajić našeho zastupjerja w towarstwje.

3.        Zańdźene lěto rozprawjach wo tym, zo bě so Budyski měšćanski muzej na nas wobroćił dla eksponatow něhdyšeho Maćičneho muzeja. Smy so hladajo na móžne dawkowe a zarjadniske problemy rozsudźili, zo maja eksponaty bjezposrědnje do wobsydstwa Serbskeho muzeja přeńć. Jedna so hłownje wo drastowe klanki a dźěle serbskich drastow, tola tež tajke wažne kruchi kaž wo wahu Jana Gelanskeho z 18. lětstotka ze serbskim napisom. Transfer so hišće njeje stał, tola po słowach nawody měšćanskeho muzeja dr. Vollbrechta ma so to bórze stać.

4.        Jako předsydstwo wobdźělichmy so na Domowinskich diskusijach wo programje a wo prašenju prawólbow. Pola programa su so wšelake naše pokiwy wobkedźbowali, tola wostanje to tekst, kotremuž bychmy přeli wěcowniši duktus a konsistentnu strukturu. Hłowny dypk bě kritika na centralistiskim koncepće. Maćica je jako juristiska wosoba čłon Domowiny, jeje čłonojo njejsu wosobinscy sobustawojo Domowiny. K prašenju prawólbow předsydy wuprajichmy swoje wobmyslenja wobdźělenja dla, wosebje hdyž je jenož jedyn kandidat nominowany.

5.        Kaž hižo w zańdźenych lětach parujemy strukturnu reformu serbskich institucijow w směrje na wjetše samopostajenje serbskeho luda. Załožba za serbski lud ma być instrument financowanja po přikładźe kulturneho ruma Hornja Łužica, nic samostatny nošer kulturneho dźěła. Z wobmyslenjemi widźimy, zo so wjac hač štwórćina załožboweho budźeja za Serbski ludowy ansambl wudawa, mjeztym zo so pola medijow a sorabistiskeho slědźenja dźeń a bóle lutuje. Za spodźiwny mamy namjet, zo ma so Serbska kulturna informacija ze Serbskeho doma do ansambla přesydlić, bjeztoho zo by dotal předležał nošny koncept za tute zarjadnišćo.

6.        Po tradiciji přewjedźechmy septemberske posedźenje předsydstwa w Choćebuzu, hdźež wopytachmy redakciju Noweho casnika. Dźakowni smy za stabilne dźěło Maśicy.

7.        Předsydstwo witaše prócowanja pomnikoweho wuběrka za wobnowjenje Smolerjoweho rowa a připraji přewzaće deficita po wotličenju.

B.        Towarstwowe naležnosće

1.        16. nowembra zańdźeneho lěta spominaše Maćica Serbska na swojeho něhdyšeho předsydu Měrćina Völkela składnostnje jeho 80. posmjertnych narodnin.

2.        Maćica ma tuchwilu 117 čłonow.

3.        Po wšelakich pospytach smy swoju internetnu prezencu wobnowili. Wužiwamy portal a wuhotowanje Domowinskeje prezency, štož bjerje nam wěstu swobodu wuhotowanja, je pak za to darmotny serwisowy poskitk. Dźakowano knj. Pohončowej smy tež tak někak na aktualnym stawje. Přez Domowinu běži tež naša mejlowa adresa.

4.        W měrcu podpisachmy dojednanje z Domowinu wo wukonjenju wšelakich zarjadniskich posłužbow. Z tym je po wšelakich dobry a njekomplikowany zakład stworił.

5.        Wěste ćeže činja přeco hišće darne abonentstwa Rozhlada do wukraja. Tu wjedźechu so rozmołwy z nakładnistwom z tym zaměrom, zo by Maćica přichodnje jenož hišće jako posrědkowarka za pjenjezy a dawkowe wobkrućenja skutkowała. Je spóznać, zo zwólniwosć k přewzaću darneho abonentstwa spaduje. Rjadować ma so tež naša skazanka Rozhlada jako towarstwowy organ.

Dźakuju so wšěm, kiž su přewzali nadawki za Maćicu, w Maśicy, w sekcijach, komisijach a dźěłowych skupinach abo jako jednotliwcy. Chcemy so tež dale zasadźować za šěrjenje serbskeje wědy, za zbudźenje serbskeje mysle a tak za dalše wobstaće našeho luda. 

Jan Malink, předsyda

28.02.2015