2022/2023

Rozprawa wo dźěławosći HRK 2022/23

Hornjoserbska rěčna komisija je so w lěće 2022 wosom króć schadźowała: 04.02., 11.03., 08.04., 13.05., 01.07., 07.07., 07.10. a 01.12.2022. Lětsa, potajkim 2023 smy so dotal jónu zešli, a to 09.02. Kaž smy to w lěće 2021 pandemije dla zawjedli, su so wšitke tute zeńdźenja jako widejokonferency wotměli, tuž smy jězbne wudawki a tójšto časa za puće zalutowali.

Na měrcowskim posedźenju 2022 smy dokónčili dźěło nad prawidłami wulko- a małopisanja. Dalši předmjet běchu dotal njediskutowane prawidła pisanja serbskich a cuzorěčnych mjenow a jich wotwodźenkow. Wot aprylskeho 2022 posedźenja smy so zaběrali ze směrnicami zeserbšćenja cuzych słowow – tute maja so rewidować a wudospołnić hladajo na rozrost anglicizmow w serbšćinje. Jeto posledni temowy wobłuk prawidłow hornjoserbskeho prawopisa, kotrež ma HRK k rewiziji předležo, a kotrež maja so z nowym nakładom Prawopisneho słownika w LND wozjewić.

2022 smy so w HRK nimo toho zaběrali ze zasadami transkripcije ukrainskeho alfabeta. Za to staj Till Wojto a Liza Waltherowa z Instituta za sorabistiku naćisk zdźěłałoj, kotryž je HRK po někotrych wuradźowanjach wobzamknyła a 1. decembra 2022 na swojej webstronje wozjewiła. Tabulku přepisowanja kyriliskeho pisma mějachmy dotal jenož za rušćinu, wona je mj. dr. wozjewjena w 4. nakładźe Prawopisneho słownika (s. 607 sć.).

Na konferency k 175. jubilejej załoženja Maćicy Serbskeje 25/26. nowembra 2022 sym jako aktualna předsydka komisije přednošowała wo załoženju Hornjoserbskeje rěčneje komisije po politiskim přewróće 1989/1990 a jeje dźěławosći z toho časa hač do přitomnosće.

2022 mějachmy někotre změny w zestawje HRK: Wopušćiła je nas kónc měrca po swojim wotchadźe na wuměnk Hańžka Smolina, mamy pak tež dweju noweju čłonow – to staj wot meje dr. Leńka Šołćina a Měrćin Bałcar, tak smy nětko šěsnaćo.

Wuslědki posedźenjow HRK su so po zwučenym wašnju nadrobnje protokolowali, T. Meškank je je do naćiska cyłkownych prawidłow zadźěłał – wobdźělenym słuša dźak za jich aktiwne sobudźěło.

dr. habil. Sonja Wölkowa