We wobłuku štyridnjowskeje ekskursije Němskeje mjeńšiny w Pólskej wopyta dźensa, 06.08.2025, skupina młodostnych Domowinu w Budyšinje. Wuprawu organizował je Michael Materlik, kotryž dźěła tučasnje za Zwjazk młodostnych Němskich mjeńšinow (BJDM).

Něhdźe 15 čłonkow a čłonow dojědźechu sej z Opole do Budyšina, zo bychu wo stawiznach Serbow zhonili. Mjez nimi běchu šulerjo a studenća, kaž tež přistajeni organizacije BJDM. W Serbskim domje wočakowaše jich referent za kulturne naležnosće a wukraj, Clemens Škoda, kotrež jim wo Serbach a dźěławosće Domowiny rozprawješe. Nimo toho wobdźělištej so Luiza Winarjec a Sarah Hančikec za Młodźinske towarstwo Pawk. Wonej rozprawještej wo nazhonjenjach a perspektiwach młodostnych jako dźěl mjeńšiny. W zhromadnej rozmołwje wuměnichu so młodostni potom wo zhromadnosćach a wužadanjach narodnych mjeńšinow. Wosebje rozestajachu so z wužadanjemi na polu rěče, identity a tradicije. Najebać rozdźělneho pochada sej wšitcy wuswětlichu, kak podobne su nazhonjenja we wobchadźe z tutymi temami, kaž tež w daledawanju kulturnych hódnotow.

Nimo Budyšina wopyta skupina z Pólskeje tež Drježdźany a Zhorjelc, zo by so tež tam z kulturnej mnohotnosću a historiju rozestajała.

Tekst: Domowina/Danica Hickec

Foće: Domowina/Beno Ćemjer