Kotry wuznam ma serbšćina za wobydlerjow Hornjeje Łužicy? Tute a dalše prašenja ma reprezentatiwna studija projekta ZARI wotkryć, kotraž so wot póndźele, 16.02.2026 přewjedźe. Podobne a přirunajomne přepytowanje je so posledni raz před něhdźe 40 lětami přewjedło. Aktualne a wědomostnje wobkrućene daty wo situaciji hornjoserbšćiny dotal njepředleža.

Dr. Cordula Ratajczakowa je nawodnica za rěčne slědźenje w projekće ZARI a ma cyłkownu wědomostnu zamołwitosć za studiju. „Efektiwna rěčna politika a naslědne spěchowanje serbskeje rěče měło na woprawdźitej potrjebje bazować. Studija skići za to spušćomny zakład datow“, měni kulturna wědomostnica. Ju podpěra mjez druhim sociolinguistika prof. dr. Nicole Dołowy.

Zaměr studije "Serbska rěč w našim regionje" je wědomostne dopóznaća wo rozšěrjenju, nałožowanju a nastajenju k hornjoserbskej rěči w serbskim sydlenskim rumje Sakskeje zdobyć. Tak maja so mjez druhim wosobinske poćahi k serbšćinje, indiwidualne nazhonjenja, rěčne znajomosće, móžnosće přiswojenja rěče kaž tež wuhlady do přichoda rěče wotmołwjeć.

Daty zběraja so w Budyšinje a Wojerecach. Při tym podpěra institut za wične slědźenje DIMA z Mannheima. Nimo toho sobudźěłaćerjo projekta ZARI naprašniki w dalšich wuzwolenych reprezentatiwnych komunach ze šěsć regionow wosobinsce rozdźěla. Rozsudne za reprezentatiwnosć přepytowanja je wobdźělenje wšitkich, kotřiž so narěča – wšojedne, hač serbsce rěča abo nic. Iniciatorojo proša tuž wuraznje, zo so kóždy, kotryž list abo naprašnik dóstanje, tež wobdźěli. Wobdźělenje je dobrowólne a naprašowanje přewjedźe so anonymnje. Studiju chcedźa zamołwići w prawidłownych wotstawkach wospjetować, zo móhli wuwića dołhodobnje přirunować.

Dalše informacije: https://zari-domowina.de/forschung/studie26/.

Syć za serbsku rěč a regionalnu identitu – ZARI je projekt w nošerstwje Domowiny –Zwjazka Łužiskich Serbow. Zaměr projekta je rewitalizacija hornjoserbšćiny. ZARI spěchuje Załožba za serbski lud we wobłuku programa "Serbska rěč a kultura w strukturnej změnje" přez zwjazkowe ministerstwo za nutřkowne naležnosće.

Přiłohi:

Foto (Domowina/Božena Šimanec): Dr. Cordula Ratajczakowa rozłožuje wotběh studije “Serbska rěč w našej regionje”, kotraž so wot 16.02.2026 w Hornjej Łužicy přewjedźe.

PDF-download: Titul naprašowanja a karta regionow (Domowina/Štefan Hanuš)