Ministerskaj prezidentaj Dietmar Woidke (Braniborska) a Michael Kretschmer (Sakska) staj dźensa w Zwjazkowej radźe w Berlinje pismo zwjazkowemu kanclerej Friedrichej Merzej podpisałoj.

Z tutym podpěrujetaj krajej naćisk zwjazkoweho ministerstwa nutřkowneho za pjate financne zrěčenje a wuzběhujetaj wuznam zawěsćeneho financowanja Załožby za serbski lud wot 2026. Přitomny bě tež Dawid Statnik, předsyda Domowiny – Zwjazka Łužiskich Serbow.

K tomu Statnik: “Dźakuju so ministerskimaj prezidentomaj za to, zo přewozmjetaj zhromadnje zamołwitosć za přichod serbskeho ludu. Braniborska a Sakska so hromadźe ze zwjazkom za to zasadźatej, financowanje wobstejacych serbskich institucijow a projektow njehladajo stupacych kóštow zawěsćić.“

Aktualnje płaćiwe Štwórte zrěčenje kónči 2025. Z lěta 1991 financuje Załožba za serbski lud institucije a projekty k spěchowanju, zdźerženju a skrućenju serbskeje rěče, kultury a identity.

Fotoe: Domowina/Božena Šimanec