Łužiski monitor 2025 – předstajenje serbskich perspektiwow
póndźelu, 25. awgusta 2025 w 13:00 hodź. na žurli Serbskeho domu w Budyšinje

Kotry wid maja Serbja we Łužicy na sebje samych? Kotru rolu hraja rěč, identita a zwjazanosć z domiznu we wšědnym dnju? Wotmołwy na tute a dalše prašenja skići Łužiski monitor 2025 – reprezentatiwne naprašowanje ludnosće braniborskeje a sakskeje Łužicy z wjace hač 1000 wobdźělenymi. Lětsa běchu wosebje Serbja we fokusu, z prašenjemi wokoło wjacerěčnosće, kulturneje identity a swojeje róle nastupajo wuwiće regiona. 

Wšitcy su wutrobnje přeprošeni. Předstajenje wuslědkow wusměri so wosebje tež na wšitkich,

– kotřiž serbske temy aktiwnje přewodźeja, wuhotuja abo sobu mysla – institucije, towarstwa, zawody, medije abo komunalne zarjady
– kotřiž chcedźa hłubši dohlad do myslow serbskeje ludnosće a jeje wuznama za Łužicu dóstać
– kotřiž trjebaja daty jako funděrowany zakład za rozsudy w politice, kubłanju, medijach, kulturnym dźěle a regionalnym wuwiću.

Na kóncu prezentacije změjeće móžnosć, prašenja stajić.

Wjeselimy so na Was.

Wo Łužiskim monitoru 2025:

W měrcu a aprylu 2025 staj wědomostnikaj Dr. Jörg Heidig (Prozesspsychologen) a Stefan Bischoff (MAS Partners) w zhromadnym dźěle ze Sakskej agenturu za strukturne wuwiće, Domowinu – Zwjazkom Łužiskich Serbow a Němskim centrumom za astrofyziku šeste naprašowanje Łužiskeho monitora přewjedłoj. Online-naprašowanje přepytuje, kak łužiska ludnosć strukturnu změnu po zakónčenju wudobywanja wuhla dožiwja. W fokusu steja problemy, šansy a strategije přichoda, lětsa wosebje ze serbskeje perspektiwy. Powšitkowne wuslědki buchu 9. julija 2025 prěni króć předstajene. Dalše informacije pod www.lausitz-monitor.de.