Dźensa wotmě so w Krabatowym młynje Serbski hospodarski forum 2025. 65 zastupjerkow a zastupjerjow hospodarstwa, kultury a politiki so schadźowachu, zo bychu wo šansach dwurěčnosće we Łužicy, serbskich předewzaćelskich iniciatiwach a skrućenju regionalneje identity rěčeli. Na zarjadowanje přeprosyli su Kulturny centrum Krabatowy młyn, zawod TDDK a Domowina přeprosyli.

Wjeršk zarjadowanja bě swjatočne přepodaće Serbskeho hospodarskeho myta 2025. Hudźbnik Syman Hejduška zarjadowanje wobrubi.

Po wodźenju po młynje zahaještaj Anton Fuchs, jednaćel Krabatoweho młyna, a Dawid Statnik, předsyda Domowiny hospodarski forum.

W swojej narěči předstaji Anton Fuchs skrótka zaměr Krabatoweho areala: “Pola nas móža wopytowarki a wopytowarjo serbsku kulturu dožiwjeć.” Wón doda, zo je posrědkowanje serbskeje kultury zdźěla tež wužadanje mjez narokom na awtentiskosć a potrěbnosćemi turizma.

Statnik wuzběhny w swojich postrownych słowach wuznam dwurěčnosće jako stejnišćowy faktor za Łužicu: „Serbšćina słuša do Łužicy kaž Sprjewja do Berlina. Dwurěčnosć njeje jenož kulturne wobohaćenje, ale hospodarska šansa – za identitu, turizm a wjazanje fachowych mocow.“ Wón wuzběhny zaměr, ličbu serbsce rěčacych dołhodobnje na 100.000 zwyšić – tež přez sylniše zakótwjenje rěče w dźěłowym wobswěće a we wšědnym dnju.

Fachowe impulsy a wuměna

Sćěhowachu přednoški wo róli serbskeje kuchnje, wuslědkach Łužiskeho monitora z fokusom na hospodarstwo, předstajenje projekta ZARI kaž tež móžnosće powołanskich wikach na Ralbičan Wyšej šuli. Zamołwita za serbske naležnosće pola TDDK Carolina Měršowa předstaješe z Gesine Kutterowej, prokuristku firmy corporate friends, nowu serbsku syć předewzaćelow. Pod hesłom: “serbšćina.hospodarstwo.přichod” přeprošujetej wonej do zhromadneho dźěła.

Myto za hospodarstwo 2025

Prěni króć spožči Domowina na tutym dnju hospodarske myto. Zaměr myta je, hódnoćić angažement předewzaćow a posłužbarjow, kotřiž so we wosebitej měrje za zdźerženje a spěchowanje serbskeje rěče a kultury zasadźeja. Za to je wuběrk Zwjazkoweho předsydstwa Domowiny kriterijowy katalog nastajił, po kotrymž so mytowani wuzwolichu.

Jury počesći předewzaća, kotrež přez widźomnu dwurěčnosć, serbske produkty abo angažement k skrućenju serbskeje identity přinošuja.

Konsum Janšojce / Martin Grunewald

Wjesny wobchod přeswědči přez konsekwentne wužiwanje serbskeje rěče a kultury: wot wuhotowanja ze serbskimi motiwami na sćěnach hač k regionalnje typiskim jědźam kaž twaroh z lanym wolijom abo plincy. Zawod podpěruje aktiwnje serbske swjedźenje a dźěła wusko z Janšojskim serbsko-němskim domizniskim muzejom hromadźe.

Towaršnosć LARO-Handels GmbH & Co. KG Njeswačidło

Nakupowanske wiki Nahkauf w Njeswačidle steja přikładnje za žiwu dwurěčnosć a to wšědny dźeń – ze serbskimi sobudźěłaćerkami, dwurěčnym popisanjom tworow a regionalnymi produktami kaž Krabatowym mlokom abo wudźěłkami klóštra Marijina hwězda. Nimo toho angažuje so předewzaće na polu sporta, na přikład jako sponsor Chróšćan sportoweje jednotki, a přinošuje zhromadnosći w regionje.

Wuznamjenjenje wopřija mytowanski pjenjez, wopismo kaž tež plaketu za dom a blido. Přidatnje předstajeja so mytowani w nadregionalnym hospodarskim magacinje.

Připóznaće za swój serbski angažement w hospodarstwje žnějachu nimo toho serbski hosćenc Wjelbik w Budyšinje, wobchod za serbske accessoiry Serbski konsum, Łužiski center we Wojerecach, wobchod Marktkauf Choćebuz, čajowy dom Oblomow w Choćebuzu kaž tež Choćebuske předewzaće TripLeap UG.

Fota: Domowina/Bojan Benić

-konsum Janšojce (wotlěwa): dr. Hartmut Leipner (městopředsyda Domowiny), Janine a Martin Grunewald (konsum Janšojce), Dawid Statnik (předsyda)

- Laro (wotlěwa): dr. Hartmut Leipner, Ronny Škoda (LARO-Handels GmbH & Co. KG), Dawid Statnik

- skupina (wotlěwa): dr. Hartmut Leipner, Uta Stoleckojc (čajowna Oblomow), Monika a Tomaš Lukašec, Madeleine Matschke (Lausitz Center), Hagen Stolecki (čajowna Oblomow), Janine a Martin Grunewald (konsum Janšojce), Ronny Škoda (LARO), Štefi a Štefan Hanušec, Dawid Statnik

Fota přikładow- wot LARO/konsum Janšojce