Štwórtk je so w Triesće kongres FUEN zahajił. Ze Serbow su tam předsyda Domowiny, Dawid Statnik, Felicia Touvenot z młodźinskeho towarstwa Pawk, Maksimilian Hasacki z Delnjeje Łužicy a Měto Nowak, referent krajneho społnomócnjeneho za naležnosće Serbow w Braniborskej, přitomni. Wulke wjeselo je powěsć ze stron Korutanskich Słowjencow zbudźiła: Dwójce pandemije dla přestorčena Europeada planuja nětko za klětu wot 25. junija do 3. julija.

Prěni dypk wobsahowych debatow běše diskusijne koło wo přichodźe kulturneje a rěčneje wšelakorosće w Europje. Pod hesłom „po puću wot Bratislavy do Triesta” su wobdźělnicy aktualnu situaciju awtochtonych mjeńšin a wulkoprojekty rozjimali. Hišće pjatk wječor je so dźěłowa skupina Non-Kin-State mjeńšin bjez maćerneho kraja schadźowała, do kotrychž tež Serbja słušeja.

Wobraz: Dawid Statnik, Maksimilian Hasacki, Felicia Touvenot, Měto Nowak a Gösta Nissen, nawoda mjeńšinoweho sekretariata w Berlinje (w.l.). Foto: Domowina.