Hišće hač do njedźele, 14. oktobra, maja zajimcy čas, so na naprašowanju čłonow wšěch serbskich towarstwow a zwjazkow wobdźělić, kiž je Domowina do nadawka dała.

Dotal je nimale 500 ludźi składnosć wužiło a naprašnik digitalnje wupjelniło. K tomu přińdu ći, kiž su naprašnik na papjerje wupjelnili: jeničce do zarjada Domowiny w Budyšinje je dotal wjace hač 150 wobalkow dóšło.

“Za nas běše tute předewzaće nowum a smy wćipni na wuslědki. Hižo nětko prajimy wšěm, kiž běchu na nadźěłanju a rozšěrjenju naprašnika wobdźěleni, wutrobny dźak”, praji dźensa w Budyšinje jednaćel Domowiny Marko Kowar.

Wupjelnjene anonymne naprašniki móžeja so hišće póndźelu Domowinje pósłać abo w jeje běrowach wotedać.