Heppenheim, 14. september 2025 

Minjeny kónc tydźenja wotmě so lětna hłowna zhromadźizna CIOFF® Němskeje. CIOFF® (Conseil International organisations de Folklore et d ’ Arts Traditionsnels) je mjezynarodna organizacija z poradźowacym statusom pola UNESCO. Wona zasadźuje so za zachowanje, spěchowanje a prezentaciju imaterielneho kulturneho herbstwa přez mjezynarodne folklorne festiwale.

Lětuša zhromadźizna steješe w znamjenju personelneho přewrota: Wjelelětny předsyda Norbert Müller njenastupi hižo k wólbam. Za noweho předsydu wuzwolichu Klausa Hohmeiera, kiž zastojnstwo za přichodne 4 lět přewza. Marko Kowar bu jako přisydnik w předsydstwje wobkrućeny.

Katharina Jurkowa a Pětr Brězan, předsydaj Mjezynarodneho folklorneho festiwala Łužica, kaž tež Tobias Rucha ze Serbskeho ludoweho ansambla wobdźělichu so na zhromadźiznje.

Centralna tema zhromadźizny bě mjez druhim zhromadna prezentacija wšitkich CIOFF®-čłonow na nowej homepage. Nimo toho ma so wutwar syćow a kooperacije mjez festiwalemi w Němskej doprědka ćěrić. K tomu bu zamołwita koordinatorka pomjenowana.

Wažnosć tajkich kooperacijow pokaza so hižo lětsa při mjezynarodnym folklornym festiwalu Łužica: Rejwanska skupina z Kolumbiskeje bě na hnydom pjeć CIOFF®-festiwalach w Němskej z hosćom. Tajke projekty skrućeja kulturnu wuměnu a podšmórnu relewancu CIOFF® jako mjezynarodna platforma.

Zdobom diskutowachu wo rosćacych wužadanjach za zarjadowarjow festiwala. Wosebje stupace zakonske žadanja – něhdźe we wobłuku wěstotnych konceptow – staja wjele zarjadowarjow před wulke zadźěwki.

Přichodna hłowna zhromadźizna CIOFF® Němskeje wotměje so klětu w Rudolstadće.