2017/18

Rozprawa sekcije hudźba Maćicy Serbskeje

 

W minjenej dobje smy jako sekcija hudźba Maćicy Serbskeje přewjedli přednoškowy a diskusijny wječork, a to štwórtk, dnja 01. februara 2018, na temu  „Přehlad a posudźowanje zběrkow serbskich ludowych spěwow“.

W pjatkownych SN (2.2.) zwěsći recensent mj. dr., poćahujo so na moje słowa a swoje dopóznaće:

„Za ‚žórła přirunowacy kritiski, komentowany kompendij, kotryž zmóžnja hudźbnym wědomostnikam kaž tež stawiznarjam, sociologam a rěčespytnikam nowe dopóznaća‘, wšak zda so zajim runje tak wulki być kaž na přednošku samym.“

 

Připódla: kak wažna a nuzna je tema, tež nastupajo serbske kulturne stawizny, pokaza wutorne delnjoserbske hudźbne wusyłanje, kotrež wěnowaše so recepciji serbskich ludowych spěwow. Bohužel šěrja so hišće wjele legendow a bajow, a to nic jeno tu. Maćica Serbska bě so jónu tež załožiła ze zaměrom lud kubłać a rozswětlić. Wo dalekubłanje w tutym zwisku (kulturnych stawiznach) wšak drje Serbja, wosebje w serbskej zjawnosći dźěłacy, jara njerodźa.

Dale mam znowa trěbnje přispomnjenje, kaž hižo před dwěmaj lětomaj na samsnym městnje, a podobnje přednjesene, nastupajo přeprošenje přez Serbske Nowiny:

Mjez jědnaće na třećej, a třomi na štwórtej, zdźěla dosć wobšěrnišimi pokiwami pjatkownych Serbskich Nowin (26.1.), někotre dny do přednoška, njemějachu za štyrilinkowe přeprošenje Maćicy Serbskeje žane městno, hačrunjež ležeše tute tam hižo z wutory 23. januara. Hakle na moje naprašowanje zjewi so wone potom wutoru 30. januara, dwaj dnjej do termina.

To njeje jenož njefernje referentej, ale tež njezdwórliwje móžnym připosłucharjam napřećo, dokelž ći chcedźa so traš z časom na wopyt zarjadowanja přihotować a nastajić.

 

Měrko Šołta

nawoda sekcije

Budyšin, 17.3.2018