Rozprawa stawizniskeje sekcije 2015/2016

Wot lońšeje hłowneje zhromadźizny Maćicy Serbskeje je stawizniska sekcija w Budyskim hosćencu „Wjelbik“ přewjedła tři zjawne zarjadowanja w rjedźe Maćičneje akademije. Běchu to:

1. 16. apryla 2015 přednošowaštaj dr. Pětš Šurman a dr. Alfred Roggan, wědomostnaj sobudźěłaćerjej Serbskeho instituta z Choćebuza,na temu Znankstwa serbskeje žywjeńskeje a twarskeje kultury“ w Delnjej Łužicy. Přednošk bě w delnjoserbskej a w němskej rěči.

2. 19. nowembra 2015 rozestaješe soznaty serbski žurnalist a publicistSieghard Kozel ze Stróže z prašenjomČehodla a kak rěče mrěja?“ – z temu potajkim, kotraž je hladajo na našu narodnu situaciju stajnje aktualna a rozpominanja hódna.

3. 28. januara 2016 předstaji wědomostna sobudźěłaćerka Serbskeho instituta w Budyšinje dr. Susanne Hozyna pod hesłom „Krabat – kuzłar a huzar“ wuslědki swojeho slědźenja wo legendarnym kuzłarskim mištrje.

Ličba wopytowarjow tutych zarjadowanjow bě lětsa nažel niša hač w zašłych lětach. Mějachmy najmjenje 9, najwjace 16 wopytowarjow, štož njeje dosć spokojace. Dźakować chcu so na tutym městnje hosćencarjam „Wjelbika“, kotřiž nas přeco přećelnje w swojej restawraciji hospoduja. Rjad Maćičneje akademije, kotryž smy nazymu 2009 załožili, chcemy tež w přichodźe dale wjesć.

Jako přichodny je planowany za 7. apryl wječork z knjeni dr. Birgit Mitzscherlich z Tachantskeho archiwa w Budyšinje, kotraž budźe stawizny a wuznam Serbskeho seminara w Praze wobswětlić. Nazymu potom přednošuje stawiznar Friedrich Pollack ze Serbskeho instituta wo Serbskim prědarskim towarstwje w Lipsku, kotrehož 300lětny jubilej lětsa wopominamy. Na tutej přednoškaj hižo nětko wšěch Maćicarjow přeprošuju.

Stawizniska sekcija ma tuchwilu 12 zapisanych sobustawow. Ju nawjedujetaj Trudla Malinkowa jako předsydka a dr. Edmund Pjech jako městopředsyda. Sekciske zhromadźizny wot lońšeje hłowneje zhromadźizny MS njejsmy přewjedli. Njemějachmy to za trěbne, dokelž so drobne přihotowanske dźěła w mjezsobnym zwisku dorěča.

 

Trudla Malinkowa, předsydka

Budyšin, 5.3.2016