2015/2016

Rozprawa předsydy Maćicy Serbskeje 2015/16

 

Předsydstwo Maćicy schadźowaše so wot zańdźeneje hłowneje zhromadźizny 28. februara 2015 šěsć króć, z toho jónu w Delnjej Łužicy, hdźež so zeznachmy ze skutkowanjom towarstwa „Stary lud“ w Dešnje. Jemu přisłušachu nimo předsydy městopředsyda Marko Kowar, pšedsedar Maśicy dr. Pětš Šurman, zamołwita za protokol Janka Pěčkojc-de Lévano, zamołwita za financy Jěwa-Marja Čornakec, zamołwity za zwiski z wukrajom Jurij Łušćanski, zamołwita za čłonstwo dr. Annett Brězanec, Marka Cyžowa a za internet zamołwita je Anja Pohončowa.

Kaž na Hłownej zhromadźiznje 2015 informowachmy, je Maćica sobustaw towarstwa „Serbski institut z.t“. Nominowachmy dr. Lenku Šołćic z Konstanca jako našu zastupjerku do towarstwa. Wona wobdźěli so30.10.2015 na Hłownej zhromadźiznje towarstwa  a poda nam wo tym rozprawu. Wobsteji nětko móžnosć, zo Maćica Serbska dalšu dźěławosć instituta po tutym puću přewodźuje. Předsyda wobdźěli so 28.08. na konsultaciji w Serbskim instituće. Wón podšmórny wažnosć zachowanja serbskeho charaktera instituta. Znajomosć serbšćiny je zakładne wuměnjenje za trajne přistajenja, tež w zajimje wědomostneje kwality. Tole ma so w trěbnych padach z kwalifikaciskimi dojednanjemi docpěć.

Wotzamknyć móžachmy transfer eksponatow z Budyskeho měšćanskeho muzeja přez Maćicu do Serbskeho muzeja. Swjatočne přepodaće bě 19. januara. Běchu to hłownje drastowe klanki a dźěle serbskich drastow, tola tež tajke wažne kruchi kaž waha Jana Gelanskeho z 18. lětstotka ze serbskim napisom a reprezentatiwne španiske sćěny z katolskich kónčinow. Mjeztym je Jürgen Maćij w měšćanskim muzeju dalše eksponaty ze stareho Maćičneho muzeja namakał, tak zo budźe so dyrbjeć akcija wospjetować. Mój namjet je, zo so składnostnje wobstatki měšćanskeho muzeja systematisce přehladaja.

Wot meje 2015 přihotowaše předsydstwo poswjećenje Smolerjoweho jubileja. We wothłosowanju z tymnymi institucijemi a towarstwami nasta ideja wjacorych zarjadowanjow, za kotrež so w zhromadnym flajeru wabi. Realizaciju přewza Ludowe nakładnistwo Domowina. Mam to za dobry přikład wuspěšneje kooperacije w Serbach.

Předsydstwo wobzamkny podpěru za zachowanje Svatovaclavskeje rotundy w Praze z 250 €. Rotunda je pohrjebne městno swj. Wjacława a je w swojich najstaršich wobstatkach w l. 932 nastała.

Předsydstwo postaji Lubinu Malinkowu (Spitzkunnersdorf) jako zamołwitu za přihotowanje 300lětneho jubileja Lipsčanskeje Sorabije w decembrje 2016.

Za Maćične dorostowe myta dóstachmy dwě zapodaći z gymnazialneho wobłuka, jedne z Delnjeje a jedne z Hornjeje Łužicy. Tutej so wuhódnoćištej a schwaleštej.

Maćica ma tuchwilu 117 čłonow. Wjeselimy so přez přistup knjeza Leipnera. Naležnosć abonentstwa Rozhlada je mjeztym nimale dozrjadowana. Přehladane wustawki su přez hamtske sudnistwo schwalene a zapisane.

Za mnje skónči so dźensa wólbna perioda a doba mojeho předsydstwa Maćicy Serbskeje. Přewzach tutu čestnu zamołwitosć po smjerći dr. Měrćina Völkela w lěće 2008. Wosom lět smědźach skutkować na dobro najstaršeho serbskeho towarstwa. Rozsud, nic hižo za předsydu kandidować, wurosće z wuskich časowych předpodaćow, kiž mi za to k dispoziciji steja, ale tež ze spóznaća, zo zamóža druzy po tutym času zaso nowe akcenty a impulsy za dźěło Maćicy dać.

Dźakuju so wšěm, kiž su přewzali nadawki za Maćicu, w Maśicy, w sekcijach, komisijach a dźěłowych skupinach, při zrjadowanju financow a listowanja a na druhich polach.

 

Jan Malink, předsyda

Budyšin, 5.3.2016