Čłonojo župneho předsydstwa “Jan Arnošt Smoler” Budyšin zetkachu so srjedu popołdnju na swoje měsačne wuradźowanje w Serbskim domje w Budyšinje. Dorozumichu so wo namjetach za Myto a čestne znamješko Domowiny. Namjety maja so do kónca junija zapodać. Prěnje tajke z Domowinskich skupin a župneho předsydstwa čłonojo diskutowachu. Towarstwa a skupiny w župje su namołwjene, wosebje angažowane wosoby ze swojich cyłkow za počesćenje namjetować.

Županka Leńka Thomasowa rozprawješe, zo přewjedu sobotu 17. meje w domje Měrćina Nowaka zhromadny wječor za wjesnjanjow. Kruh přećelow domu Njechorńskeho chce dom za wjesnjenjow wotewrić. Zhromadnje chcedźa sebi filmy wo serbskim wuměłcu wobhladać. Ludźo ze wsy chcedźa wědźeć, kak je Njechorński tehdy žiwy był a při tym chcedźa zhromadnosć pěstować. Z podpěru ZARI-projekta ma so zarjadowanje přewjesć. Přichodne zjawne zarjadowanje w domje Měrćina Nowaka ma być Swjatki póndźelu.

Borbora Felberowa, předsydka Domowinskeje skupiny Komorow/Trupin/Rakecy informowaše wo nowej tafli wo serbskich stawiznach wsy, kiž je skupina z pomocu gmejny w Komorowje připrawiła. Njedawno mějachu w Komorowje přednošk Susany Hozyneje wo nałožkach mjez nowembrom a Wałporu. Na 30 zajimcow je přišło.

Motiwatorka w župje, Raphaela Wićazowa, rozprawješe wo tym, zo podpěra cyłki w regionje při mejemjetanju. W Hodźiju na př. podpěruje projekt pućowanskeje šćežki za Pětra Młónka. Zaměr je, z praktiskej wěcu zajimcam serbšćinu sej wotkryć pomhać. RĚČna hodźina na prěnjej srjedźe w měsacu ma mjeztym krutu skupinu staršich a wěnuje so stajnje hinašej tematice.