Na swjatočnym zarjadowanju je předsyda Domowiny Dawid Statnik dźensa wječor w Budyšinje angažowanym Serbowkam a Serbam Myto Domowiny, Myto Domowiny za dorost a Čestne znamješko přepodał. Wo hudźbne wobrubjenje postaraštaj so Milena Wowčerjec a Matej Dźisławk.

W swojich dźaknych słowach nawjaza předsyda Domowiny Dawid Statnik na citat serbskeho molerja Měrćina Nowaka-Njechorńskeho, kotryž by lětsa swoje 125. narodniny woswjećił: 

“... Nochcu być wuměłc jenož za wuměłstwo a wuměłstwa dla, nic serbski moler, chcu jenož słužownik serbskeho ludu być a wo nim swědčić. To je moje dźěło, mój nadawk! ... “

Z tutym citatom dopominaše předsyda na to, zo njebě za Nowaka-Njechorńskeho wuměłstwo samozaměr, ale běše to wuraz wosobinskeje zamołwitosće a jeho zwjazanosće ze swojim ludom. Ze swojim molerstwom chcyše serbske žiwjenje, rěč a kulturu zwobraznić a wobchować – w času, w kotrymž bě serbska identita husto wohrožena.

Předsyda wuzběhny, zo je tehdyše zhladowanje wuměłca na swoje skutkowanje bjezdwěla tež dźensa hišće směrodajne. Słowa Nowaka-Njechorńskeho njejsu tuž wid do zašłosće, ale ćim bóle tež dźensa naš nadawk – namołwa, serbske herbstwo z angažementom a hordosću dale njesć. Z tutymi słowami podźakowa so předsyda Domowiny za wurjadne čestnohamtske dźěło lětušich lawreatkow a lawreatow.

W mjenje wšitkich wuznamjenjenych poda lětuša lawreatka Carola Holdtowa ze Spalow dźakne słowa. Wona dźakowaše so wosebje župje “Handrij Zejler” Wojerecy a župnemu předsydstwu za hódnoćenje jeje angažementa. Kaž wona wuwjedźe, je wona serbšćinu hakle pozdźišo wukła, štož jej “ženje njeje hańba była“, dokelž je “z cyłej wutrobu Serbowka.” Dale wona doda, zo so po přewróće prawidłownje ewangelske a katolske žony zetkawaja.

Město rozdźělow zwěsća wona skerje zhromadnosće a da přitomnym na puć: “Njech naša serbska domizna w zhromadnosći dale wobsteji.“

Foto (Domowina / Bojan Benić): Lawreaća Hilžbjeta Štilerowa, Rosemarie Christoph, Bernadet Kowarjowa, Jan Bělk, Margit Neugebauer, Carola Holdtowa, Claudia Końcakowa, Mylene Krawcykojc, Fred Kaiser, Christina Fabianec, Angelika Müselerowa, Eliška Oberhelová kaž tež předsyda Domowiny Dawid Statnik (wotprawa)

Myto Domowiny 2025

Jan Bělk (Wutołćicy)
Wot swojeho dźěćatstwa sem wěnuje so Jan Bělk serbskej hudźbje a kulturje. Jako předsyda Zwjazka serbskich wuměłcow a čłon mnohich gremijow, mjez nimi Zwjazkoweho předsydstwa Domowiny, je rozsudnje přinošował spěchowanju serbskich wuměłcow. Wón komponuje hudźbu, produkuje zynkonošaki a podpěruje chóry kaž chór Meja abo Serbski muski chór Delany. Tež  zestaja wón wideja, kotrež tež na socialnych medijach wozjewja. Bělk zwjazuje tak tradiciju a moderne posrědkowanje kultury a zasadźuje so za trajnu widźomnosć serbskeje hudźby.

Carola Holdtowa ze Spalow

Carola Holdtowa je sej wosebje za hajenje serbskeje drasty a nałožkow pola młodostnych zasłužby zdobyła. Wona organizuje rejwanske a spěwne projekty, nawjeduje serbske reje za dźěći a stara so wo to, zo wostanu swjedźenje kaž Krabatowe hry w Čornym Chołmcu abo serbski domizniski dźeń we Wojerecach žiwe. Ze swojim wjelelětnym dźěłom w Domowinskej skupinje Spale a swojej wosobinskej zahoritosću za rěč a drastu motiwuje wona młode generacije, sej serbske kulturne herbstwo wažić a dale njesć.

Fred Kaiser z Dešna-Strjažowa

Fred Kaiser je jako wjesnjanosta, zapósłanc wokrjesneho sejmika a wjelelětny Domowinjan serbsku kulturu w Dešnje widźomnu činił. Projekty kaž „Serbske dwórske mjena“ abo Dešnjanski domizniski muzej noša jeho rukopis. Wón podpěrowaše rěčnu iniciatiwu „Witaj“ a załoži zhromadnje z koparskimi towarstwami serbsku wubranku. Kaiser je politiku, kulturu a čestnohamtske zastojnstwo zwjazał a mosty mjez generacijemi twarił.

Myto Domowiny za dorost 2025

Mylene Krawcykojc z Gołbina
25-lětna nawjedujo ako pókładnica jadnu z nejwětšych kupkow Domowinskeje młoźiny Dolna Łužyca a angažěrujo se za dalejdawanje rěcy a tradicije nejmłodšym, rowno tak cesnoamtski ako teke pówołański we Witaj-źiśowni „Mato Rizo“.
 

Čestne znamješko Domowiny 2025

Angelika Müselerowa z Komorowa                         
Hilža Štilerowa z Chrósćic      
Christina Fabianec z Noweje Łuki
Kito Hendrich z Barta
Margit Neugebauer z Drjowka
Rosemarie Christoph z Turnowa-Pśiłuka
Claudia Końcakowa z Turjeja                                     
Bernadet Kowarjowa z Miłoćic
Eliška Oberhelová z Michalovic

Foto (Domowina/Bojan Benić):