Poradźowacy wuběrk za naležnosće serbskeho ludu při zwjazkowym ministerstwje nutřkowneho je so wčera w Berlinje schadźował. Zwołał bě rjadne posedźenje předsyda wuběrka, społnomócnjeny Zwjazkoweho knježerstwa za prašenja wusydlencow a narodne mjeńšiny dr. Bernd Fabritius. Sydom čłonow wšitkich w Zwjazkowym sejmje zastupjenych stron wobdźěli so aktiwnje. Nimo toho běchu zastupjerjo serbskeho ludu, kaž tež zastupjerjo Swobodneho stata Sakskeje a Kraja Braniborskeje, mjeńšinoweho sekretariata a Zwjazkoweho ministerstwa nutřkowneho přitomni.

W srjedźišću wuradźowanjow steješe přiwzaće narodnych mjeńšin do Zakładneho zakonja. W septembru tutoho lěta je Zwjazkowa rada na iniciatiwu krajow Schleswigsko-Holsteinskeje, Braniborskeje a Sakskeje rezoluciju wobzamknyła, w kotrejž Zwjazk namołwja, štyri awtochtone narodne mjeńšiny w Němskej eksplicitnje w Zakładnym zakonju zakótwić. Dlěje hač hodźinu dołho wuměnichu so zapósłancy Zwjazkoweho sejma ze zamołwitym za mjeńšiny wo tym, kak měła so w aktualnej wólbnej periodźe problematika doprědka ćěrić. Přitomni běchu sej přezjedni: Měli z parlamenta jednać a nic čakać. Z mjeńšinowopolitiskeho wida bě to pozitiwny signal.

Předsyda Domowiny Dawid Statnik bě spokojny: „Wjeselu so, zo mějachmy dźensa po wšěch stronach jara čiłu a wotewrjenu diskusiju k tutej temje. Tale starosć budźe nas w přichodnym času zaběrać. Sym sej wěsty, zo budźemy dołhi dych trjebać. Ale tuchwilu smy w diskusiji dale hač w minjenych 30 lětach. Rady přiwozmjemy poskitk přitomnych zapósłancow, z frakciskimi nawodami w tutej naležnosći do rozmołwow přińć.“

Dalše temy běchu aktualna rozprawa wo połoženju a wuwiću serbskeho ludu, trajace prócowanja wo nowe pjate finančne zrěčenje Załožby za serbski lud a přesadźenje wobzamknjenja konferency kultusowych ministrow wo posrědkowanju wědy wo narodnych mjeńšinach. Jako čłon Serbskeho młodźinskeho towarstwa Serbska Murja rozprawješe Florian Kießlich wo wubranych ćežišćach jich młodźinskeho dźěła. Ze žortom a šarmom produkuja mjez druhim wideja k stawiznam Serbow (hlej na (1) Serbska Murja - YouTube)  a angažuja so zhromadnje z Maćicu Serbskej w kubłanskich formatach na Instagramje (hlej na Instagram). Nimo toho přewjeduja hižo třeći raz kwis, kotryž na hrajkace wašnje dohlad do rěče, kultury a stawiznow Serbow posrědkuje. Přichodny budźe sobotu, 29.11.2025 wot 17:00hodź. w Chróšćan jednoće. Zajimcy móža so pola Serbskeje murje přizjewić: serbskamurja@web.de abo na zarjadowanje dojěć.

Poradźowacy wuběrk skutkuje hižo lěta jako centralny koordinowacy gremij wuměny mjez Zwjazkom, krajemi a zastupjerjemi serbskeho ludu. Tak přinošuje rozsudnje k zdźerženju a skrućenju serbskeje rěče a kultury. Zastupujo zajimy serbskeho ludu su so wobdźělili předsyda Domowiny Dawid Statnik, městopředsyda dr. Hartmut Leipner kaž tež hłowna jednaćelka Judit Šołćina a jednaćel Marcus Końcaŕ. Załožbu za serbski lud zastupowaše předsyda Załožboweje rady Marko Kowar. Jako zastupjer serbskeje młodźiny wobdźěli so Florian Kießlich, kotryž je mj. dr. čłon towarstwa Serbska Murja.