We wobłuku źinsajšnego casnikaŕskego rozgrona jo Domowina „Myto za góspodaŕstwo“ pśedstajiła. Zastupujucy pśedsedaŕ dr. Hartmut Leipner jo rozkładł slězyny nowego myta ako teke kriterije za pósćenje toś togo. Zaměr myta jo, gódnośiś angažement pśedewześow a słužbywugbarjow, kótarež se wósebnje za zdźaržanje a spěchowanje serbskeje rěcy a kultury zasajźuju.

„Jo wjelgin wažne, to serbske wšedny źeń dožywiś a to teke w zjawnosći pokazaś, dokulaž naša rěc jo bytostny źěl identity a kulturnego derbstwa. Z toś tym wuznamjenjenim comy cesćiś pśedewześa, za kótarež dwójorěcnosć jo samorozmějuca a kótarež z tym jasne znamje za kulturnu daju.” tak dr. Hartmut Leipner, kótaryž jo teke pśedsedaŕ wuběrka za nastupnosći strukturneje změny, góspodaŕstwa a infrastruktury. Wuběrk jo myto w slědnyma lětoma wuwijał.

Góspodaŕske myto Domowiny se lětosa prědny raz pósćijo a měri se na samostatnych, pśedewześa abo zawody kenž:

• serbsku rěc aktiwnje we wšednem źěle wužywaju, abo
• dwójorěcne pósłužby a wugótowanja z toflami póbituju, abo
• komunikaciju z kupowarjami a sobuźěłajucymi teke w serbskej rěcy woplěwaju, abo
• dobrowólne iniciatiwy k spěchowanju serbskeje rěcy a kultury zwopšawdniju.

Zajmowane aktery mógu se wótněnta pśez formular/katalog kriterijow póžedaś. Cas procowanja kóńcy se 15.09.2025.

kontakt:

Domowina – Zwězk Łužyskich Serbow
Pětš Brězan, referent za góspodaŕske a infrastrukturelne nastupnosći
mejlka: peter.bresan@domowina.de
tel: + 49 (0) 3591 550-201

Projekt spěchujo Załožba za serbski lud, kótaraž dostawa lětnje pódpěru z dankowych srědkow na zakłaźe góspodaŕskich planow, kenž su Nimski zwězkowy sejm, Krajny sejm Bramborska a Sakski krajny sejm wobzamknuli.