Serbski kšywowy zwězk Domowina se wobźělijo w „Mobilnych rumach pśichoda” Fraunhofer-instituta za źěłowe góspodarstwo a organizaciju (IAO) we Łužycy. Karin Tšukowa jo ako regionalna powědarka Domowiny wałtoru, 28. januara 2020 na zachopk w Chóśebuzu pódla a groni k tomu:

My Serbowki a Serby smy załožk regionalneje identity Łužyce z našeju kulturu a rěcu. Serbske zgromaźeństwo se togodla wjelgin rad zapśimjejo z lokalneju wjelerakosću do diskusije wó perspektiwu našogo regiona.

Teke nam lažy infrastruktura a industrielna masa stwórjonych gódnotow na wutšobje, ale rowno tak jo nam wědobnje: Pšawa kwalita žywjenja dostanjomy pśez wšednu zgromadnosć w našych jsach a městach. Zagórjonosć młoźiny za nacasne woplěwanje serbskich nałogow wob lěto jo naš socialny drogownik.

Smy źěkowny, až móžomy z wjele akterami wó nowe impulse za dalšne wuwiśe našogo regiona pśemyslowaś. Rewitalizacija wósebnje dolnoserbskeje rěcy a z tym teke tradicionelneje wěcejrěcnosći jo jaden kluc za wótwórjenje swójskego kreatiwnego potenciala našeje domownje.https://www.cerri.iao.fraunhofer.de/de/news-uebersicht/idt-labore.html