Domowina njejo jano we Łužycy aktiwny zwězk, ale jo zgromadnosć, kótaraž se we wjele krajach za zachowanje a spěchowanje serbskeje rěcy kultury zasajźujo. Wažny nadawk maju pśi tom naše asociěrowane cłonkojske towaristwa. W toś tych towaristwach zwenka Łužyce su pśijaśele Serbow zjadnośone, aby serbsku rěc a kulturu pódpěrali.

Towaristwa a zjadnośeństwa, kótarež zwenka Łužyce statkuju, mógu Domowinje ako asociěrowane cłonki pśistupiś. Zgromadne źěło rědujo dojadnanje, kótaremuž musy zwězkowe pśedsedaŕstwo pśigłosowaś.

Naše asociěrowane cłonkojske towaristwa

Zawězanje asociěrowanych towaristwow do źěła kšywowego zwězka pokazujo se pśedewšym w pšawidłownej wuměnje a w zgromadnem zwopšawźenju projektow. W srjejźišću stoje mjazsobne woglědy, specifiske tematiske zarědowanja ako teke wobstawna wuměna. Asociěrowane towaristwa njejsu w zwězkowem pśedsedaŕstwje zastupjone, jich póstarki a ideje pak pśi našom źěle wobglědujomy.

Wósebnje w susednyma krajoma Pólskej a Českej se wjelgin za Serbow zajmuju. Slědujuce towaristwa su tam aktiwne: 

• Wrocław, Pólska – Towarzystwo Polsko-Serbołuźyckie
• Opole, Pólska– Pro Lusatia webbok
• Warszawa, Pólska– Towarzystwo Polsko-Serbołużyckie
• Poznań, Pólska– Towarzystwo Polsko-Serbołużyckie
• Sochaczew, Pólska– Towarzystwo Polsko-Serbołużyckie
• Praga, Česka – Společnost přátel Lužice webbok
  
  

Asociěrowane cłonki mamy teke w Awstralskej a Americe. Su to pśedewšym pótomniki Serbow, kótarež su pśed wěcej ako 175 lětami wudrogowali.

• Adelaide, Awstralska– Wend/Sorb Society of South Australia Inc. webbok
• Awstralska – Wendish Heritage Society Australia Inc. webbok
• Giddings (Texas), USA – Texas Wendish Heritage Society webbok
  
  

Nejmłodše asociěrowane towaristwo ma swójo sedło w pódpołnocnej Nimskej a pósćiwa se wósebnje stawiznam połobskich Słowjanow:

• Lüchow (Wendland) – Wendischer Freundes- und Arbeitskreis e. V. webbok