Čłonojo Zwjazkoweho předsydstwa Domowiny (ZPD) doporuča projekt digitalneho serbskeho kulturneho registra z wysokej prioritu na Załožbowej runinje wobjednawać. Zarjadej Załožby za serbski lud doporučeja móžnosće pruwować, zo projekt z pilotoweje do praktiskeje fazy zběhnu a financielne srědki za njón organizuja. W srjedźišću steji inwentarizacija objektow a datow z čehož na kóncu digitalny katalog nastanje.

Za přichodne spožčenja Myta Domowiny wobzamknu čłonojo na doporučenje wuběrka za wudźěłanje namjeta za wysokosć mytowanjow Domowiny, zo změni so wysokosć dotacije. Wotnětka spožči Domowina lětnje hač do tři Myta Domowiny, kóžde z dotaciju 2.500 Euro. Zakład za to bě kritiski diskusijny přinošk Leńki Thomasoweje na lońšej Hłownej zhromadźiznje Domowiny, zo so hódnoćenje dźensnišim poměram přiměri. Trěbne financne srědki so zaplanuja.

Dale schwalichu čłonojo ZPD lětuši plan dźěławosće zarjada a dźěłowy plan Rěčneho centruma WITAJ. Prezidij dósta nadawk, zwoprawdźenje hromadźe z jednaćelku Domowiny a wjednicu Rěčneho centruma WITAJ běžnje kontrolować. Nawodnica, dr. Beata Brězanowa, rozkładźe při tym, zo zaměrnje na wudaću němsko-serbskeho šulerskeho słownika dźěłaja. Dale chcedźa lětsa serbski tekstowy korpus natwarić.

Jednaćelka Judit Šołćina w tutym zwisku na zjawne předstajenje noweje webstrony Domowiny 16. apryla do Wojerec přeprosy.

Přichodnu 24. rjadnu hłownu zhromadźiznu Domowiny zwołachu čłonojo ZPD za 24. apryla 2027 we Wojerowskej župje »Handrij Zejler«. Tam chcedźa prěnju połojcu wólbneje doby 2025-2029 bilancować a předźěłane dźěłowe směrnicy schwalić.

Do wuběrkow powołali

Zwjazkowe předsydstwo Domowiny powoła do přihotowanskeho wuběrka za Mjezynarodny folklorny festiwal „Łužica – Łužyca” 2026 – 2029 Gabriela Krawca (Serbska rejowanska skupina Smjerdźaca),  Błažija Handrika (Serbski folklorny ansambl Wudwor), Marka Klimana (gmejna Chrósćicy) kaž tež Katharinu Jurkowu a Pětra Brězana (zarjad Domowiny).

Bosćija Benadu, Carolinu Měršowu, Roberta Engela, Gesinu Kutterowu, Ronnya Škodu, Martina Grunewald a Milana Funku powołachu do wuběrka za spožčenje „Myta za hospodarstwo“ w  lětach 2026-2029.

Za sobudźěło w gremiju za projekty strukturneje změny wot 2026 – 2029 namjetowachu čłonojo Zwjazkoweho předsydstwa Domowiny do poradźowaceho wuběrka Dirka Nazdalu, župa “Handrij Zejler” Wojerecy, Kati Strukowu, župa Jakub Lorenc-Zalěski, Romana Dźisławka, župa “Jan Arnošt Smoler” Budyšin a Romana Nuka, župa “Michał Hórnik”, Kamjenc.

Křesćana Lebzu jako rjadneho čłona a Dianu Pawlikowu jako jeho zastupjerku powołachu čłonojo za poradźowace sobudźěło we wuběrku młodźinskeje pomocy wokrjesa Budyšin w dobje 2026-2029.

Do dohladowanskeje rady Astrocentruma Łužica gGmbH (DZA) powołachu čłonojo předsydu Domowiny, Dawida Statnika. Gremij změje 11 čłonow a čłonkow. Serbski zastupjer ma natwar centruma přewodźeć a regionalnje zakótwjeć.

Zwjazkowe předsydstwo wobzamknje, zo skutkuje Domowina wotnětka w přiradźe němsko-pólskeho Europskeho zwjazka za teritorialne zhromadne dźěło EVTZ mbH (Europäischer Verbund für territoriale Zusammenarbeit). Referent Clemens Škoda budźe zastupjer Domowiny w tutej přiradźe. Domowina je čłon UNESCO 5-projekta. Zhromadne dźěło w projekće wuskutkuje so na serbski podźěl mjezypřesahowaceje towaršnosće geoparka Mužakowski łuk (Geopark Muskauer Faltenbogen).  

Zwjazkowe předsydstwo powoła Pětra Brězana, referent za hospodarske a infrastrukturne naležnosće, jako zastupjerja Domowiny w Turistiskim zwjazku Hornja Łužica za přichodne štyri lěta. Wón zastupuje Domowinu w čłonskej zhromadźiznje lětnje a we wuběrku za marketing. Nadawk turistiskeho towarstwa je, region wokrjesow Budyšin a Zhorjelc turistisce zwičnić.